YiNtatheli kaMthunywa
INHLANGANISO yeZimbabwe Volleyball Association (ZVA) isikhethe umhlonitshwa uMxolisi Ndlovu ukuba abe ngumkhokheli wayo.
UNdlovu, oseleminyaka eminengi ekhokhela umdlalo we-volleyball kungatsha ezitshiyeneyo, ungene esihlalweni ngeviki edluleyo kulandela ukuqhatshwa komhlangano womdlalo edolobheni leMasvingo.
Umkhokheli omutsha lo uthethe isikhundla ebesibanjwe nguRingisai Mapondera osesebenzela iZone Six engunobhala jikelele.
Ekhuluma lentatheli yephephandaba likazulu ngoLwesibili ntambama, uNdlovu uthe umlandu wakhe ngowokukhulisa umdlalo we-volleyball.
“Isiqokoqela yikuthi sakhe umdlalo lo. Ngizatshutshisa ukuthi abantu bawulandele ngobunengi,” kutsho uNdlovu.
“Ubunengi babalandeli buzadonsa njalo lethalenta elitsha elikwabasakhulayo emdlalweni. Ngiza sebenzela ukuthi ibizo elithi Zimbabwe Volleyball Association lisabalale yonke indawo.”
Uthe loba umdlalo wabo wamiswa ligcikwane leCovid-19, inhlanganiso yeZVA isiqalile ukulungiselela imncintiswano yomnyaka ozayo.
“Sizakhangelisisa ukuthi imidlalo yethu izaqalisa njani ngesizini ezayo. Sifuna ukuthi siqoqe imncintiswano eminengi ukuze abadlali bathole isikhathi sokuzitshengisela.”
Uthe inhloso yabo yikuthi kuminyaka ezayo ilizwe leZimbabwe liqoqe ukunxusa amanye amazwe.
Kukhetho lwezikhundla lolu, kuvotelwe kusikhundla sikamgcinisikhwama uRegion Moyo, unobhala omutsha ngu-Enias Kenneth Kondo.
USibangani Mashasha lo Farai Mboto bangene kuzihlalo zamalunga agcwalisa ikomithi entsha yeZimbabwe Volleyball Association.