uMthunywa
Ethel Ncube
UMHLABELELI wezokholo usekhuthaze uzulu ukuthi asekele abahlabeleli abasacathula kundima le ngoba inengi labo liholwa ngumoya ekuhlanganiseni ingoma lezi.
UMakesure Mkheswa (29) owazakala ngokuthi nguMkays kwezomculo wezokholo uthe abahlabeleli abakundima le baholwa ngumoya ukuze babhale ingoma ezivuselela umphefumulo okuyikho okudingwa ngabalandeli abehlukeneyo.
Uthe bona nxa sebekhiphe ingoma lezi ezibavuselelayo badinga ukuthi abalandeli basekele umculo wabo ngokuwutshaya ezinkonzweni lasembuthanweni etshiyeneyo.
Ekhuluma lentatheli kaMthunywa uMakesure uthe umculo wezokholo udinga ukuxhaswa.
“Sidinga usekelo lwabalandeli futhi sifisa ukuba nxa bangalalela ingoma zethu basitshele ukuba silungisise ngaphi ukuze siqondise amaphutha ethu.
“Ngaqala ukuhlabela ngo2015, ngakhupha idlalade lami lakuqala ngoMfumfu 2022. Idlalade lami lilengoma eziyisikhombisa ezithi: Amazulu, Ngiyabonga, Jerusalem, Carry me home, Mercy, Wena ulapha, Ngcwele kunye le-single yami ethi Akasoze, kuchaza uMakesure.
Uqhubekele phambili eveza ukuba ukhangelele ukukhula kwezomculo lo.
“Ngifisa ukusebenzisana labanye abahlabeleli abatshiyeneyo kwezokholo siphakamise uJehova sivuselele ukholo. Okwakhathesi ngisapheka elinye idlalade lami engifisa ukuba liphume kuyonale inyanga kodwa alikapheli.
“Kubahlabeleli abasacathulayo ngithi asiqineni ekuhlabeleni sibekezele, kuzalunga,” kuphetha uMakesure.
