uMthunywa
YiNtatheli kaMthunywa
UZULU kuleli usequme ukusebenzisa indlela zesintu ukuze bazivikele kubhubhane lweCovid-19, nanko phela inani labantu abahlaselwa yi-coronavirus liqhubeka liqansa kusa kwamalanga kulandela ukuqubuka ngamandla kwehlandla lesibili lomkhuhlane lo.
Kusukela ngenyanga kaMbimbitho nyakenye lapho okwatholakala khona umuntu wokuqala oleCovid-19 kuleli, sokulabantu abangu-23 239 asebanjwe umkhuhlane lo futhi kulabangu-942 asebebhubhile.
Ngenxa yokuthi banengi abantu asebehaqwe yiCovid-19 kuleli, uzulu usezinike umlandu wokulandela indlela zesintu okubikwa ziyasiza ukulwisa amandla omkhuhlane lo ebantwini.
Ukufutha, ukunatha amanzi atshisayo afakwe i-ginger, ilemoni, i-garlic, umsuzwane kanye loluju ngokunye osekuhlezi kusemlonyeni yabanengi njalo okusabalaliswa kunkundla zokuxhumana ezehlukeneyo njengendlela zokuvikela kanye lokulwisa isifo seCovid-19.
Esinye isakhamuzi sakoBulawayo elokitshini leMagwegwe esisebenza edolobheni uNomathamsanqa Ndiweni, uveze ukuthi usebenzisa indlela zesintu ezigoqela lokufutha ukuzivikela kuCovid-19, olubuye ngamandla kuhlandla lesibili.
Uthe uyazama ngayo yonke indlela ukugxila emsebenzini wakhe loba nje esiba lovalo ngoba imbiko yokufa lokuhlaselwa kwabantu yiCovid-19 izwakala nsukuzonke.
“Ngiyeqisa nje ilanga elilodwa kwelilandelayo ngiyafutha nxa ngivela emsebenzini ngoba ngizwa kuthiwa lokhu kuyaphathisa ukuthi kubulale igcikwane leli masinyane,” nguNdiweni lowo.
Lokhu kwenzakala njalo ngesikhathi indawo ezinengi zivaliwe ngenxa yalo ubhubhane.
Ugatsha olubona ngezeMpilakahle kanye lokondliwa kuhle kwabantwana luqhubekela phambili lukhuthaza abantu ukuthi balandele indlela zokuzivikela okubalwa kuzo ukugqoka izaheke lokuqhelelana.
