uMthunywa
Nkosilathi Sibanda
WAFIKA ezama inhlanhla kuqembu leHighlanders ngesizini ka-2015, abaqeqetshi bathi ngeke angene, kodwa khathesi usefunwa liqembu elifanayo.
Le yiyo indaba esegudwini ngomdlali weBulawayo Chiefs uMalvin Mkolo. Umdlali lo kuzwakale ukuba kumalanga ambalwa azayo uzabe esehlelweni lomqeqetshi weBosso uBaltemar Brito.
Abafakazi abaqotho abasebenzela iHighlanders bancwebe uMthunywa indlebe bathi ekupheleni kwesizini ka2021/ 2022, uBrito watshela “abadala” bethimu ukuthi uzafuna ukuthi uMkolo aze eqenjini lakhe.
Arthur Musiyiwa ephethe inkezo
UMkolo ngumdlali wakuqala ophuma kwelinye iqembu ukuhuga amehlo kaBrito. Umqeqetshi lo okwakhathesi ukibo ePortugal njalo ukhangelelwe ukuthi aphenduke kulimpelaviki.
“UBrito watshiya ekhulumile ngalumdlali uMlavin Mkolo. Umfuna phansi phezulu,” kutsho umfakazi oqotho ochatheke ngodaba.
Ukuzwa ngokuthi uBrito usekhetha abadlali kuzindaba ezinhle kubalandeli beBosso ngoba sebekubona ukuthi umqeqetshi lo ulombono. Besekujwayelekile ukuthi inkokheli zalithimu zizikhethele abadlali, obekuyinto ebicunula abathandi bethimu.
uObriel Chirinda
IHighlanders ifuna njalo abanye abadlali kuMakhosi Amahle uMthokozisi Msebe lo-Arthur Musiyiwa.
Kuthe ngokuzwa ukuthi iBulawayo Chiefs isisehluleka ukubhadala abadlali bayo, iBosso ihle yasukumela phezulu.
Ibone ukuqhula kweChiefs njenge thuba lokuthi izivuse. UMkolo, Masiyiwa loMsebe badlala esiswini senkundla, okuyindawo ebikhathaza abaqeqetshi ngoba balutshwane abadlali beHighlanders abakade besenelisa ukulibamba ibhola, balichaye phakathi laphakathi kwenkundla.
Okukhange iHighlanders kubadlali laba yikuthi bebehlohla njalo. UMusiyiwa, oleminyaka engu-27 yokuzalwa, wahlohla ibhola elinzima kumdlalo wabo leqembu leHerentals ngesikhathi inqoba iChiefs isicoco seChibuku Super Cup, enkundleni yeBarbourfields.
Kuyavela ukuthi ukukhotha ingqweqwe zomlomo okwenziwa ngabafana beChiefs, kulakho ukuthi kudale ukudilika kweqembu ngoba akula mdlali ongamelana lendlala kulamadlelo angcono.
Intatheli kaMthunywa izame ukuxhumana lesikhulumi seBulawayo Chiefs uThulani “Javas” Sibanda, kodwa ucingo lwakhe belungadojwa.
Loba kunjalo, kusegudwini ukuthi leliqembu litshele abadlali balo ukuthi bakhululeke nxa befuna ukuyadlalela amanye amaqembu, okutshengisa ukuba inkokheli zayo ziyazi mhlophe ukuthi imali ayikho.
Nxa abadlali bengathengwa ngamanye amaqembu, kuzajabulisa imuli zabo nanko phela zacina ukuncinda izibiliboco ngenyanga kaNhlangula. Amakhosikazi abadlali beChiefs asetshengisele aze adela emahofisini eqembu ezama ukufuqa ukuthi imali iphume.
Kwezinye indaba zokuthengwa kwabadlali, iphephandaba likazulu lithole udletshana njalo lokuthi iqembu leChicken Inn selikhangelele ukulolonga umgadli walo uObriel Chirinda lomdlali wasemuva weBulawayo City uMpumelelo Bhebhe.
