Nkosilathi Sibanda
IHIGHLANDERS ibika ukuba uMadinda Ndlovu usengumsekeli kamqeqetshi weqembu elikhulu aphinde abengumqondisi wokulolongwa kwabadlali abasakhulayo.
Iwofisi yezokukhitshwa kwembiko kuBosso ifake umbiko wokuqhatshwa kukaMadinda emakhasini ayo kuTwitter lakuFacebook.
“Siyajabula ukwazisa ngokubuya komqeqetshi uMadinda Ndlovu osenguqemsekeli kamqeqetshi weqembu lakuqala kunye lokuba ngumqondisi wokulolongwa kwabadlali abancane.”
UMadinda wake waba ngumqeqetshi kuleliqembu eminyakeni emibili edluleyo.
Kusukela ngo2018 kusiya ku-2019 uMadinda wathola ukuhlonitshwa ngabalandeli beBosso ngokuvuselela uhlelo lokuphakamisa abadlali abasacathula.
Iqembu elabunjwa nguMadinda labizwa ngokuthi yi-ECD. Wabumba iqembu elachaya ibhola kakuhle kodwa kwehlula ukuthola imiklomelo eyajabulisa abalandeli.
Wasuka wayaqeqetsha eBotswana kuGaborone United.
Umqeqetshi omutsha lo ukhangelelwe ukuthi aqale umsebenzi nanko isizini iqala mhlaka 18 Mbimbitho.