Sebethembele kuMapeza

26 Nov, 2020 - 00:11 0 Views
Sebethembele kuMapeza Norman Mapeza

uMthunywa

Wayne Ncube
OWAKE waba ngumqeqetshi weFC Platinum uNorman Mapeza usephinde njalo wabizwa emsebenzini kuqembu leli kulandela ukuxotshwa kukaDe Jongh obengelamvumo yokuqeqetsha imidlalo yeConfederations of African Football (CAF).

Iqembu limemezele ukuphenduka kukaMapeza owatshiya iqembu phakathi kwemidlalo ka2019 ngoMbimbitho futhi ukhangelelwe ukukhuza iqembu emdlalweni yalo ekhona ngempelaviki eMozambique

Iqembu likhangelele ukuya eMozambique lamuhla ngendizamtshina lapho elizaqondana leqembu le-Costa do Sol.

Umkhokheli weFC Platinum uFabian Mashingaidze uqinisekisile ukuxotshwa kuka De Jongh kanye lokubizwa kukaMapeza.

“Inhlanganiso kanye lamalunga ebhodi yeFC Platinum bathanda ukwazisa uzulu wonke, ngesinqumo esesithethwe ngoDe Jongh ukuba akehlukane leqembu ukuvikela kanye lobuhle beqembu.

“Siyambonga uDe Jongh ngakho konke asenzele khona njengeqembu sibonga ubugcitshi bakhe obenza iqembu laphenduka esimweni salo sokunqoba,” kulandisa uMashingaidze.

“Okukhulu sithanda ukwazisa uzulu ngokuphenduka kukaMapeza esilesiqiniseko sokuthi uzaqeqetsha iqembu liye kuzinga eliphezulu, nanko phela wake walikhuza laze lathwala inkezo kabili kuPremier Soccer League.

“Okusiphe amandla okuthi siphendukise uMapeza eqenjini yikuba ngesikhathi sisehlukana konke kwakukuhle kungakho-ke silesiqiniseko sokuthi uMapeza laye ukhangelele ukuba iqembu linqobe kuCAF,” kuchaza uMashingaidze.

UMapeza ukhangelelwe ukuqhubeka leqembu maduzane esazi injongo kanye lezifiso ezikhangelelweyo ukwakha iqembu elinqobayo.
Isikhathi uMapeza etshiya umsebenzi wokuqeqetsha kuFC Platinum akukho owayecabangela ukuba uzakuphenduka lapho okwakhitshwa khona umbiko ukuba uMapeza usesehlukana leqembu.

Share This:

Sponsored Links