uMthunywa
Thokozile Mbedzi
INHLANGANISO ebona ngezokulima izilimo ezitshiyeneyo iAgronomy Research Institute eMatopo ikhuthaza abalimi ukuba basebenzise umquba wemvelo ngoba utholakala lula.
Ekhuluma lentatheli kaMthunywa uMnumzana Derick Mangoro ubike ukuthi umquba wemvelo ulula ukuthi abalimi bawuzuze njalo kawubulali lezinanakazana eziphathisa ukuvundisa umhlabathi njalo ulesilinganiso esikhulu sokugcina amanzi.
“Sandise ukucebisa abalimi ukuba basebenzise umquba wemvelo ngoba ulula ukuba bawuthole njalo awulandleko ezinengi kukanti awubulali izinanakazana ezincedisa ukuvundisa umhlabathi.
“Umquba wemvelo ungenisa umoya kukanti nxa uwusebenzisile ulesilinganiso esikhulu sokugcina amanzi,” kubika Mangoro.
Uqhubekele phambili eveza ukuba umquba wemvelo awulandleko ezinengi kangako.
“Abalimi bangehlisa indleko zabo zokuthenga umvundiso nxa bangasebenzisa umquba wemvelo akulamali oyifakayo ukuze uwuthole. Umquba lo utholakala lula, loba nini njalo ngowamahala,”kuphetha uMnu Mangoro.
