Uncategorized

Sebenzisani amakhiye ale-khamera, fingerprint le-pin code

09 May, 2024 - 00:05 0 Views
Sebenzisani  amakhiye  ale-khamera,  fingerprint le-pin code

uMthunywa

Thokozile Mbedzi

AMAPHOLISA akuleli asexwayise uzulu ukuthi asebenzise amakhiye alamakhamera (camera), fingerprint kunye le-pin code ezivalweni zezindlu ikakhulu lapho abagcina khona impahla zabo eziligugu.

Ekhuluma lentatheli kaMthunywa uSergeant Farai Moyo eseZimbabwe International Trade Fair kumaviki asanda kwedlula, uthe sekulamakhiye angancedisa uzulu ukuvikela impahla yabo. 

“Sokulamakhiye esikhuthaza labo abalempahla eligugu kibo ukuthi bawasebenzise ukuze bavikele impahla yabo kuzigelekeqe esezihluphile.

“Amakhiye la, alekhamera, i-finger print kunye le-pin code. Nxa usebenzisa umhlobo lo wekhiye akulasela elingenelisa ukugqekeza lingene lapho okungamelanga lingene khona.

“Ikhiye le ivumela lowo ole- pin code lobuso obuyibo obuvunyelwayo le-finger print ukuba angene kuleyo indlu,” kuchasisa uSgt Moyo.

Uthe ikhiye le ilakho ukuvikela impahla kazulu kwabagangileyo kungakhathalekile ukuthi ngabasincedisayo ezindlini ngoba labo balakho ukuganga.

Zimbabwe International Trade Fair

“lkhamera iyabe ithatha okwenzakalayo endaweni lapho efakwe khona njalo kulendlela ezinengi zokulondoloza konke okuyabe kusenzakala endaweni efakwe khona.

“Ikhiye le sikhuthaza ukuba ifakwe endaweni eziqakathekileyo njalo silokhe singezelela ubucwepheshe ngayo ukuze uzulu alondoloze impahla yakhe,” Sgt Moyo.

Ubuye waveza ukuthi sebeqalile njalo ukufaka amakhamera emgwaqweni yemadolobheni besebenzisana lamakhansili.

“KoBulawayo, kumgwaqo kaJoshua Mqabuko Nkomo sekufakwe amakhamera akhangela okwenzakalayo. Lokhu sikwenzela ukulondoloza impahla zikazulu.

“Labatshayeli bezimota labo abangalandeli imithetho yemigwaqo loba abatshontshayo balakho ukubonakala sihle sithathe amanyathelo kusesemasinya senqabele ukulahlekelwa zimpahla lezingozi ezingavelela uzulu zibangelwa ngabatshayeli abephula imithetho yemigwaqo,” kutsho uSgt Moyo.

UChief Superintendent Blessmore Chishaka uthe uzulu kasondele emapholiseni ezothola ulwazi lobuchwepheshe obutsha lobu.

“Uzulu kabuye ezothola ulwazi lobuchwepheshe emapholiseni ukuze impahla zabo zivikeleke njalo lemigwaqweni sesifake amakhamera azancedisa ukulwisa izephulamthetho,” uSuperintendent Chishaka. 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds