uMthunywa
Thokozile Mbedzi
INHLANGANISO yeTarget Livestock Consultancy Greenhouses and Spray Races ikhuthaza abalimi kundawana zonke zelizwe ukuba bathathele phezulu indlela yama-Greenhouses yokulima ngoba inika umlimi isikhathi eside sokulima izilimo ezitshiyeneyo njalo lomkhathi kawuguquki.
Ekhuluma lentatheli kaMthunywa uMnumzana William Manyika ongu-consultant uthe bona njengenhlanganiso bakhuthaza abalimi ukuba balime ngendlela ye-Greenhouse ngoba inika abalimi isikhathi eside sokulima izilimo zabo.
“Abalimi sibakhuthaza ukuba kabathathele phezulu indlela yokulima eye-Greenhouse ngoba inika abalimi isikhathi eside sokulima izilimo zabo njalo lomkhathi wakhona kawutshintshi. Lokhu kwenziwa yikuthi ilanga elingeniswa kuGreenhouse liba lesilinganiso esifanayo phakathi. Isikhathi sokulima umlimi ulakho ukusingezelela lanxa kungaba yisikhathi somqando.
“IGreenhouse inhle ngoba kulendlela ezenziwayo zokuba isilinganiso sesikhudumezi sihambelane laleso silimo umlimi afisa ukuba asilime ngoba nxa kungekho kumaGreeenhouse okunye kucina kutshazwa loba kungakhuli nxa kuthe kwaba lokutshintsha komkhathi.
“IGreenhouse iyancenda ngoba ihlala ivaliwe ukuze umkhathi uhambelane lalokho okufunwa yizilimo kusetshenziswa ama-heater. Kukanti umoya lawo ulendlela yawo yokuqondiswa uhambelane lezilimo umlimi afisa ukuzilima kusetshenziswa i-air ventilation kusiya ngomhlobo wesilimo umlimi afisa ukusilima,” kuchaza uMnu Manyika.
Uqhubekele phambili esithi indlela le ifanele indawo ezingelazulu elinengi ngoba umlimi elakho ukulima noma yisiphi isilimo afisa ukusilima.
“Lindlela ilusizo ikakhulu ngesikhathi esikiso lapho okwaba lezulu elilutshwana ngoba abalimi bayenelisa ukulima zonke izilimo abangafisa ukuzilima njalo akudingakali amanzi amanengi.
“Amanzi lawa alakho ukusetshenziswa abuye njalo asetshenziswe ngoba kulendlela ezinengi amaGreenhouse akhiwa ukuze kulondolozwe amanzi umlimi enelise,” kuphetha uManyika.
