NguEmmanuel Ndlovu
INDLELA eya edolobheni leVictoria Falls ayisalali nyoka ngenxa yamalungiselelo edili lokuthakazelela ukuzalwa kukaMongameli welizwe uKhomuredi Robert Mugabe elizakwenziwa ngempelaviki kukanti abadlali bakulelidolobho bathi sokubaphuzele.
Idili leli likhangelelwe ukuqhutshwa ngoMgqibelo enkundleni yeElephant Hills Resort Golf Course ngaphansi kwendikimba ethi: Celebrating the birth of Gushungo, the icon of Zimbabwe’s revolution and champion of youth empowerment.
Lokhu kusitsho ukuthakazelela ukuzalwa kukaMongameli onguye ungqongqotshe owakhokhela inguquko yezokuphathwa komnotho welizwe leZimbabwe kanye lokunika abatsha amandla okuzithuthukisa.
Isikhulumi senhlanganiso emele abadlali iVictoria Falls Arts Association (VIFAA), uNdabezinhle Sibanda uthe amalungiselelo omkhosi lo asesebangeni eliphezulu.
“Konke sokulindele uMongameli ukuthi azothakazelela ilanga lakhe lokuzalwa eseFolosi. Njengabadlali bakulindawo sesiqedile ukucolisisa imidlalo yethu njalo sesimelele ukuthi sithokozise uGushungo.
“Okuhle ngalumthimba yikuthi uzathuthukisa udumo lwethu njengabadlali bakuleli idolobho usenze sazakale elizweni lonke jikelele,” kutsho uSibanda.
Ubuye wathi kulamaqembu alitshumi akhangelele ukuthokozisa izethekeli kulindawo.
Lamaqembu agoqela iVictoria Falls Ubuntu, Inhalilayi, Pezhuba Pachena, Black Amakhwezi, Inkume Arts kanye lamanina eSinambya aweqembu leNsumbule.
Ngemva kwalelidili, kuzaba leGala ezaqala ntambama enkundleni yenguqu eselokitshini leChinotimba.