uMthunywa
Nkosilathi Sibanda
ISIKIPA seqembu leHighlanders singaze sibize intengo edulayo, abalandeli bayo kukhanya bazasithenga loba sekutheni.
Kubonakele lokhu, nanko inkokheli zeqembu zibika ngokubobotheka ukuthi izikipa zonke ezaqala ukuthengiswa kumaviki amabili adluleyo, sezathengwa zaphela du.
IHighlanders ithole i-kit entsha mhlaka 21 Mabasa, okudale ukuthi abalandeli bayo balinde ezabo izikipa ngelihlo elibomvu. Isikipa esisodwa besibiza i-US$25.
Isikhulumi seHighlanders uNozibelo Maphosa utshele uMthunywa ukuba labo basala bephelelwe ngokubona indlela abantu abasekela ngayo iqembu.
Highlanders 2023 kits
“Sikhuluma nje akusela lutho,” kutsho uMaphosa ebikela intatheli yephephandaba likazulu.
“Asikaze sikubone okunje. Abantu basekela iHighlanders okweqiniso, ngenhliziyo zabo. Kuyabongeka. Yikho sihlala sibabaza ukuthi ubuhle beBosso ngabalandeli bayo.”
UMaphosa uthe njengoba izikipa zakuqala ziphele ngokuphangisa, bakhangelele ukuthi ezilandelayo zithengwe ngokufanayo.
“Izikipa esizitholileyo beziyi-200 kuphela kodwa sikhangelele ukuthi sithunyezelwe ezinye kumaviki ambalwa alandelayo. Banengi abantu abalokhe bebuza ukuthi ezinye izikipa zizakuba lazo nini.”
Inkampani exhasa iBosso ngezikipa ngeye-On The Ball Looks.
Okungabe kusenza ukuthi kube losekelo olukhulu kanje, yikudlala kweqembu, osekwenza lababukeli bagcwale phamu enkundleni yeBarbourfields.
Kuyabonakala njalo ukuthi izikipa zeBosso sezigqokwa nsuku zonke. Lalapho iqembu lingadlali, kujwayelekile ukuhlangana lomuntu osigqokileyo.
Ngendlela okubikwa zithengwe ngayo izikipa, kunakanelwa ukuthi kulabanye abathenga ezintathu umuntu eyedwa.
“Mhlawumbe sebezigqoka nsuku zonke. Ukhona engimaziyo owathengela imuli yakhe yonke izikipa. Uyathola amalunga wonke egqoke okufanayo mhla womdlalo,” kutsho omunye umsekeli weBosso ebuzwa yintatheli ngokuthengwa kwezikipa zethimu yezwe lonke.
Kusenjalo, loba iBosso ithabele ukuthengwa kwezikipa lezi, iqembu selikhuthazwe ukuthi lenqabele ukwanda kwezikipa zayo ezingekho emthethweni.
Kumasizini adluleyo iHighlanders yanikeza isicelo kubathengisi bempahla ezitolo zakoBulawayo ukuthi batshiyane lomkhuba wokuthengisa izikipa lezi okungekho emthethweni.
Bakhona njalo abazithungela eyabo i-kit, osekucasule iBosso labaxhasi bayo ngoba laba abantu “batshontshela” iqembu imali.
IHighlanders yabika ukuba lo ozatholakala ethengisa izikipa okungekho emthethweni uzabotshwa. Abathengisi abaqamula umthetho laba batholakala ikakhulu kuma-flea market enzikini yedolobho lakoBulawayo.
