uMthunywa
Thokozile Mbedzi
SEZIHLEZI ziphethe izibindi ngezandla izakhamizi zeMasera eBeitbridge nanko phela kubikwa indlovu sezingena emizini yabantu zisidla amabele.
Kubikwa uhlupho lwendlovu lolu luqale ngenyanga kaNhlolanja osekusenza besabe ukuyadinga izifuyo zabo ezingabonakaliyo ngoba indlovu lezi zibonakala egangeni kunye lemakhaya.
Ekhuluma lentatheli kaMthunywa uNkosazana Mbongiseni Mleya uthe bahlalele evalweni ngendlovu esezifika emakhaya abo.
“Sihlalele evalweni silapha ngoba indlovu zibuya emakhaya, kusa kwamalanga zizodinga amabele aseziphaleni. Sesisesabela impilo zethu silapha. “Indlovu lezi bezisithwalise nzima emasimini, khathesi sesivunile sesifake amabele ezingalaneni sezibuya zizokudla khonokhu okuncinyane esikutholileyo.
Asazi ukuba sizaphila njani ngoba kasisela kudla emasimini seziqedile lemakhaya sezisilandela,” kuchaza uNkszn Mleya.
“Akusahambeki, ngikhuluma nje egangeni ngoba sokunzima loba ukuthi siphume siyenqanda izifuyo egangeni.
“Imbuzi ezinengi kazila mazinyane ngoba zingazalela egangeni kubanzima ukuthi ntambama sizidinge lapho ezingabe zizalele khona ngoba sisesaba indlovu.
“Siyesaba ngoba ngezikhathi ilanga litshona ziyabe sezibuya emakhaya njalo emini zilakho ukungabuyeli eguswini khatshana zizilalele egangeni lapho okulezihlahla ezinengi khona.
“Lokhu kwenza lempilo zethu zibesengozini enkulu kakhulu,” kulandisa uMnu Mleya.
Imizamo yokukhulumisana labeZimbabwe Parks and Wildlife Management Authority eBeitbridge yehlule.
