uMthunywa
THINA esikhule ensukwini zayizolo, indlela owawuvunula ngayo yiyo eyayihle ibucacade, ibuchamuse ubuntu bakho. Phela insizwa yayithi nxa ivunule isudu kukhanye ukuthi nansi indoda emadodeni, lalapho ukhulumisa itshitshi lentombi uphambana lalo ezitaladeni zedolobheni, ubone layo isima imoyizele ibobotheke, ngoba isikhangekile.
Ngikhumbula enye indoda engake ngasebenza layo ingumaqhuzu wawuthi ungabuya emsebenzini ungagqokanga kuhle, ikubisele ngekhaya ize yekelele ngolimi lwabo ndlebe zikhany’ ilanga ithi “go and dress properly.”
Manje amajaha akulezinsuku bagqoka isikhindi, ukabhudula, i-track bottom aphinde agqoke ibhulugwe elide. Uthi nxa ekhothama umuntu wakhona kube lula ukuthi uwabale amabhulugwe akhona ngoba amanye akhwezwa phezulu kubesekusiza ehliselwa phansi asazi kumbe kuyabe kusenzelwa ukuthi angenise umoya, kumbe njalo ehliselwa ukuthi umuntu angaphunyukwa umoya uthole ithuba lokuphuma.
Ngiyangizibuze ukuthi ngesikhathi sokutshisa benza kanjani ngoba phela ngesikhathi sokutshisa amaginqo ayajuluka yonke indawo umuntu acine esenuka amaginqo kukanti abanye bahle banuke okwechalaha elifele emaxhaphozini akoNtunjambili.
Esinye isimanga yikuthi loba sebegqoke amabhulugwe amafitshane bayelekanisa, asazi kumbe bayabe befuna ukwengeza ifiga. Lokugqoka behambelanisa imibala yebhulugwe lamayembe abakwazi uthole nje umuntu esefana lomchilo wamakhosikazi ngoba imbala yonke uyayithola lapho.
Loba sebegqoke zona ezenguqu bayelekanisa uthole umuntu egqoke i-track suit ngapha elamakawuso amabili ngaphansi, ngiyake ngibone lemitshoveni nxa uwindi ethi uyakhothama evala isivalo kuvela lawo mabhulugwe esengcole abayingcino uthola odade sebechila amakhala, besenyanya kusweleke nje ukuthi batsake amathe okwemamba emnyama elophaphe ekhanda, ngoba amafasitela ayabe evaliwe.
Aluba bevunula kanje befunda ezifundweni zezinga eliphansi bengizakuthi mhlawumbe besaba ukuthi nxa sokukhala uswazi benzela ukungezwa buhlungu, manje asazi.
Ayixabene.
