uMthunywa
Thokozile Mbedzi
SEZIDLELA evalweni izakhamizi zeBeitbridge ngemva kokuba elinye iqula lezigelekeqe elibizwa ngokuthi ngomagumaguma lidubule enye indoda libalele yafa.
Isehlakalo lesi senzakale ngoMvulo kuyonale iviki emfuleni uLimpopo ngehola letshumi ekuseni.
Kubikwa umuyi, uFarai Ruzvidzo obeleminyaka yokuzalwa engu-25 weBeitbridge wehlelwa ngamashwa la ngesikhathi ehamba loMnumzana Godfery Shaya Wabhaya oleminyaka engu-29 yokuzalwa osuka eShurugwi ngesikhathi bechapha umfula uNgulukudela besiya kweleSouthAfrika bethwele igwayi lohlobo lweRemington ngezikhwama.
Kubikwa ababili laba bathi sebesekhunjini lomfula bahlangana labomagumaguma abangu-21 behlomile ngezibhamu zomhlobo wama-pistol lama-short guns amabili babathathela igwayi, omakhalekhukhwini qede babadubula okwabangela ukuthi uFarai awele phakathi kwamanzi kukanti uGodfery wasila ngesikhala senalithi.
Ekhuluma lentatheli kaMthunywa uMnumzana Thikhathali Mleya uthe yena ubegola inhlanzi emfuleni ngesikhathi ababili laba behlangana labomagumaguma laba behlomile.
“Mina bengithiya inhlanzi ngabona amadoda amabili engena emfuleni efuna ukuchapha aye kweleSouth Africa lapho ahle ahlangana labomagumaguma abangu 21 abahle babasusela amanqe.
“Uhlupho lusuke lwaba yikuthi umuyi uFarai usuke wacela i-sim card yakhe kanti yayisiwuchithile umuthi inkonyane ngoba bathi kababuyele lapho abavela khona bathi besanda kutshibilika babe sebeluthelile unhlamvu emzimbeni wahle wawa uFarai.
“UGodfrey yena wasizwa ngamadlozi akibo kungakho wahle wacatsha,” kuchaza uMnu Mleya.
Imizamo yokukhulumisana lesikhulumi samapholisa esabelweni seMatabeland South yehlule.
