Savul’ Amasango Ngengoma!

27 Sep, 2018 - 00:09 0 Views
Savul’ Amasango Ngengoma! MduSevan

uMthunywa

Vusumuzi ndlovu
QOKI babali kwelinye njalo ihlandla laleyi nkundla kuphephandaba likazulu. Kuliviki sihamba ngohambo lomculi wolutsha olusukumayo kumdumo we-House Music. Lujaha kuyajabulisa ukumbona engadeli ukuqhubeka eqhunsa njalo esungula umsebenzi wakhe njalo ekhula kumdlalo wokuqhunsa ingoma, esenza umsebenzi obanakalayo emphakathini.

UMduSevan ube lomcimbi ophumelele kakhulu ekhankasela imvukuzane ngomculo eThe Vista kumaviki adlule.

UMduduzi Ngoma usesungule idlalade lakhe uBroken Boundaries, elichaza ukuvula kwamasango ngengoma.

Lelidlalade lilengoma ezilitshumi lambili labahlabeleli abadlula itshumi abakhona kulumsebenzi. Umdumo wakhe uyahlanganisa uhlobo lwe House, iAfro dance, njalo uthole lapho insimbi ezijula khona ma ulalele lelidlalde.

Kusukela kusingeniso sakhe semizuzu emibili uyezwa uhlangabezwa luphondo lwe saxophone, olukhomba ukuba khona kwe-jazz, kusehla lusiya ngena ku Love At first Sight ingoma elo Thandeka. Lapha kubonisanwa ezothando, kudluliselwa ku Nkosi King kungoma ethi Ngiyohlala Ngikukhumbula.

Ekulaleleni lezizontathu ingoma uvele uboniswe uthando lokuphulwa kwenhliziyo njalo uyahamba ngalo uthando phose kungoma eziyisithupha, ebalulekisa ngothando engomeni zakhe. Ezinye zalezo ezothando zibalisela uLove, Ngicel’uxolo, Child Of the Soil lo Random Girl. Kuthi ma lelidlalade selijula, siboniswa insimbi zika MduSevan, sokuqala ukungena uMaBhebhe, u Ke kgathetse khudu lo Ingozi.

UMduSevan usebenzisana Tin Tin kuElectric Blues, ingoma elesiginci esizwakala okwemizuzu edlula eyisithupha idlalade lingakayi emaphethelweni le Djembe Monks. Lapho ke kuhlanganiswa ingungu iDjembe Monks edume ngayo lensimbi zikaMdu, besakha ingoma efanele isiphetho somsebenzi wejaha lase Barboufields.

Kweminye imisebenzi ekhona egudwini lika Mthwakazi sizathanda ukuncoma uMsizKay, ekuphutsheni ingoma yakhe loSandra Ndebele uEngikuzwayo. Lingoma ingene emisakazweni jikelele ngempelaviki edlule, njalo ikhona lasebulenjini. Kusenjalo sizancoma umabonakude wesilo somculo uJeys Marabini eyokuqala kudlalade lakhe lalonyaka uNtunjaMbili, uWobuya. Lividiyo isile viki ezimbili isungulwe ebulenjini be YouTube.

UJeys ubonisa ukubaluleka kokuhlala ethandweni noma abantu bexabene. Njalo uthi ukwehlukana kombono kwabathandanayo akumelanga kube yimbangela yokungaxolelani. Ukhuluma ekhuthaza isithandwa sakhe ukuba siphenduke kuye ngoba esamthanda, ethi lezontaba (inkinga abalazo) zimsithela isithandwa sakhe.

Siyabonga maviki wonke babali ngosekelo lwenu, ukwanda kwaliwa ngabebusuku batsho abadala. Sobonana kuviki elizayo lamanye amalangabi avuthayo asegudwini lemphakathini kwelakithi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds