uMthunywa
YiNtatheli kaMthunywa
KULENDODA ebubule yangaqedi isitshaywe ngabalandeli beHighlanders ngemva kokuba idonse ithawulo kanozinti weHwange uNedrick Madeya kumdlalo obuseBarbourfields ngeSonto.
Lokhu kwenzakale enkundleni le lapho okwaziwa ngokuthi kuseSoweto ngemva kwegedi likanozinti, ngesikhatshana nje umdlalo uqalisile. Okumangalise inengi labantu abakade behlezi eSoweto yikuthi uMadeya ubeqeda ukujikela abasekeli beBosso ithawulo, kwakhanya angathi bayakujabulela lokhu.
Kodwa kuthe uMadeya esekhiphe enye ithawulo, kwaba lendoda eyayidonsayo umdlalo uqhubeka, okwaba yikho okwacunula abanye abasekeli beBosso, ngoba bekubona ukuthi wenze icala.
Intatheli yephephandaba likazulu ibone indoda le ithelwa ngempama ebezivela ebantwini abanengi, yaze yadatshukelwa yisikipa sayo. Kuze kwalamula “amabhawu” eqembu leHighlanders adonsele indoda le phandle kwenkundla.
Imizamo yokuthola ibizo layo, yehlule. Esinye isiqhwaga sithe: “Simxotshele phandle. Ubezalimala laphana, angithi weqele phakathi kwenkundla wathatha ithawulo leli. Uphambanisile kodwa bekungamelanga bamtshaye,” kutsho isiqhwaga lesi esiyale ukutsho ibizo laso.
Kukho konke lokhu, ababukeli basele bephethe imibuzo yokuthi kuyini ngethawulo likaMadeya, okudale ukuthi kutshaywe umuntu ngalindlela.
Kwandise ukuthi ababukeli benze okunje kodwa bakhuzwe kungabi lokulwa.
Kumaviki adluleyo kucatshangelwa ukuba umsekeli owatshisa ithawulo likaMadeya, wafa ngemva kokutshaywa yimota. Abanye ababili abancedisa kulokhu, kubikwa bakhuthwa zimota bezama ukuchapha imigwaqo koBulawayo.
“Kukhona okutshaya amanzi ngamathawulo omdlali lo. Kambe umuntu atshayelwe ithawulo nje. Yebo siyavuma ukuthi nxa wayelidonse phakathi kwenkundla, wenza iphutha, kodwa kungani watshaywa ngaleyo ndlela,” kutsho uCynthia Dube ongumsekeli weHighlanders oxoxe lentatheli ngemva komdlalo.
Intatheli yephephandaba likazulu izame ukuxhumana loMadeya kwehlula ukuthi adobhe ucingo lwakhe, kwaze kwafika isikhathi sokudindwa kwephephandaba.
Abafakazi abahlala eHwange abaseduzane lonozinti lo bathe akulanto “esindayo” ngethawulo.
“Ukuthwala ithawulo yisitayila sakhe uMadeya. Nxa eselokitshini uhlala eyigaxile, akulanto eyethusayo ngayo,” kutsho uInnocent Chimwanza ohlala elokitshini le-Number 1 eHwange.
Kusenjalo, inhlanganiso yePremier Soccer League ibika ukuba abasekeli bamaqembu abayekele umkhuba wokungena enkundleni lokugikijela izigubhu.
UMadeya usedume ngethawulo yakhe emhlophe angena layo enkundleni kuyo yonke imidlalo.
