uMthunywa
Joel Ndlovu
ABALIMI sebekhuthazwe ukuba behlise inani labantu abangena lapho okuhlanyelwe khona izilimo ngoba kungenzeka kungene umuntu olomkhuhlane we-Covid-19 ucine uhlala ezilinyweni.
Ekhuluma lentatheli kaMthunywa uMnumzana Mike Rugowo oyingcitshi kwezokulima esabelweni seMatabeleland North uthe abalezivande emalokitshini lapho abalima khona ikakhulu imibhida lamatamatisi kumele bengavumeli abantu bengena lapho abahlanyele khona ngoba umkhuhlane weCovid-19 usugcwele.
“Umhlaba wonke uhlaselwe ligcikwane le-coronavirus ngakho-ke kuqakathekile ukuthi abalimi behlise inani labantu abangena lapho abahlanyele khona izilimo zabo ngoba sekungenzeka ukuthi umuntu olomkhuhlane lo angene lapho aqale ukubambabamba amahlamvu embhida lamatamatisi atshiye igcikwane ezilinyweni,” kuchasisa uMnu Rugowo.
“Ezivandeni ikakhulu ezemalokitshini izilimo zandise ukuminyana kungakho-ke nxa umuntu ehamba phakathi uyabe ethinta izilimo ngempahla zakhe.
“Omunye umuntu usengangena engadini ethwele umkhuhlane lowo ngempahla zakhe ewutshiye esivandeni ngokuhamba ethinta izilimo yikho nje sixwayisa abalimi ukuba bangangenisi abantu ezivandeni zabo. Laye umninisivande kumele abone ukuthi engakabambi izilimo zakhe uyahlanza izandla zakhe ngamanzi alesepa loba ngemithi ehleliweyo eyokubulala igcikwane leli.
“Isilimo singakhiwa kumele sigeziswe kakhulu singakathengiswa njalo singakaphekwa. Ngesikhathi lesi kumele abantu bezinakekele kakhulu,” kulandisa uMnu Rugowo.
UMnu Rugowo uqhubekele phambili esithi ayisiwo wodwa umkhuhlane okumele bewukhangele, kumele beqhubeke befafaza imithi eqeda imikhuhlane lezibungu ezibulala izilimo.
“Abalimi akumelanga bavimbe umkhuhlane we-corona kuphela kodwa kabaqhubeke befafaza imithi yokubulala izibungu lemikhuhlane ehlasela izilimo zabo ngoba bengekela balakho ukulahlekelwa yinzuzo yabo.
UMnu Rugowo uphethe ngokukhuthaza abalimi ukuthi baqhubeke ngokulima.
“Abalimi kumele baqhubeke ngokulima ngoba abantu kumele bathole okokudla,” kuphetha uMnu Rugowo.
