Qaphelani umkhuhlane wesibhono ematholeni

16 Sep, 2021 - 00:09 0 Views
Qaphelani umkhuhlane wesibhono ematholeni

uMthunywa

YiNtatheli kaMthunywa
INHLANGANISO yeVeterinary Services isixwayise abalimi kundawana zonke zelizwe ukuba balimuke ukugula kwamathole okubangelwa yikungahlangani kuhle kwesibhono.

UDokotela wezifuyo uNdabezinhle Mkhwananzi uthe ukungavaleki kuhle kwesibhono sethole kulakho ukuphambanisa impilakahle yalo njalo lokhu kwandise ukubangelwa ngumdabuko wethole lakhona.

Ekhuluma lentatheli kaMthunywa uDkt Mkhwananzi uthe kulemikhuhlane etshiyeneyo ebangelwa yisibhono enkomeni kodwa ovame ukuba yingozi ezifuyweni ngowe-umblical hernia.

“Imikhuhlane yesibhono minengi ezifuyweni kodwa ovamileyo enkomeni yi-umblical hernia, wona ohlasela ithumbu lapho okulesibhono khona kungangena ingcekeza nxa inkonyane isanda kuzalwa.

“Ingcekeza leyo ibangela ukuthi isibhono singavaleki kuhle. Kukanti kwesinye isikhathi kubangelwa yikuthi kuleminye imihlobo ethelelwanayo kusuka kumhlobo wenkomo ezala leyo.

“Inkonyane nxa izalwa akumelanga ingenwe yingcekeza ngoba lokho kwenza isibhono singavaleki okutsho ukuthi ithumbu lesibhono lakhona lizahlala likhamisile,” kuchasisa uDkt Mkhwananzi.

UDkt Mkhwananzi uphinde njalo waqoqonsela ukuthi kubalulekile ukuthi umlimi abe leqiniso lokuthi inkomo yakhe iguliswa yisibhono.

“Kumele umlimi aqaphelisise abone ukuthi inkomo yakhe ihlutshwa yisibhono hatshi umkhuhlane we-navel ill ukuze yelatshwe ngendlela eqondileyo.

“Okuqakathekileyo kakhulu nxa inkonyane izalwa kumele ifakwe iBetadine/iodine kukanti nxa ivele isigula kuyabe kudinga ukuthi iyehlinzwa ukuze kuqondiswe lelophutha,”  kuphetha uDkt Mkwananzi.

Share This:

Sponsored Links