uMthunywa
Thokozile Mbedzi
ABABONA ngempilakahle yezifuyo abeVeterinary Services sebekhuthaze abalimi abafuyileyo kundawana zonke zelizwe ukuba baqaphele umkhuhlale we-lumpy skin ngoba uvamile nxa izulu lingaba linengi.
Ekhuluma lentatheli kaMthunywa uDokotela wezifuyo uNdabezinhle Mkhwananzi uthe abafuyileyo kumele baqaphele lumkhuhlane ikakhulu khathesi ngesikhathi sezulu.
“Abafuyi ngalesi sikhathi sezulu elinengi kumele baqaphele umkhuhlane we-lumpy skin ngoba uvamile.
Umkhuhlane lo uhlasela inkomo ezinkulu lezincane.
“Umkhuhlane lo ubangelwa yizinanakazana ezilumayo ezifana lemiyane njalo kweminye iminyaka umane uqhamuke nje. Lokhu kwenzakala nxa kungahlala iminyaka embalwa ungekho njalo lonyaka kungenzakala ubekhona njengoba kube lezulu elinengi,” kuchaza uDkt Mkhwananzi.
“Umkhuhlane lo kwezinye izikhathi ungabuya ulamandla kukanti kwezinye izikhathi ube nganeno. Izibonakaliso zalumkhuhlane zigoqela ukutshisa komzimba, ukwehlisa uchago olulutshwana, ukungafuni ukudla, ukudana kanye lokuvuvuka isikhumba.
“Ukuvuvuka kwesikhumba kungaba lamaqhubu amakhulu loba amancane njalo amanye abamakhulu okungalingana lenqindi loba isibhakela nxa usuhlasele kakhulu.
“Umkhulane lo uyavuvukisa langaphakathi komzimba kubangele ukufa kwezifuyo. Umkhuhlane lo welatshwa ngejekiseni ye-penicillin kukanti ungenqatshelwa ngeLSD vaccine,” kuphetha uDkt Mkhwananzi.
