uMthunywa
Thokozile Mbedzi
AMAPHOLISA akoBulawayo asexwayise uzulu ukuba aqaphele amasela ngesikhathi sombukiso weZimbabwe International Trade Fair oqale ngoLwesibili.
Isikhulumi samapholisa akoBulawayo uInspector Abednico Ncube ubikele uMthunywa ukuthi ngenxa yokuthi abantu banengi koBulawayo ngoba belande umbukiso weZITF, amasela lawo asuka athathe amathuba agqekeze ezimoteni, atshontshe endaweni ezehlukeneyo kukanti amanye ayakhuthuza lezikhwama.
“Uzulu kumele aqaphele kakhulu amasela ngesikhathi lesi sombukiso weTrade Fair ngoba amasela athi angananzelela ukuthi abantu baphatheke kumbukiso bona sebetshontsha impahla eziyabe zingasagcinakalanga.
“Abahamba ngezimota kumele bananzelele njalo babone ukuthi bayakhiya izimota zabo ngaso sonke isikhathi. Bangatshiyi phakathi impahla elakho ukuhuga amasela ukuthi avule izimota,” kutsho uInsp Ncube.
Uqhubekele phambili esithi uzulu kumele aqaphele ukuba engahambi ngendlela zokuqumela ngoba kuyingozi.
“Ukuhamba ngendlela zokuqumela kuyingozi kakhulu ngalesi isikhathi ngoba ulakho ukuthathelwa impahla njalo lokudlwengulwa loba ukulinyazwa.
“Sikhuthaza abantu njalo ukuthi bangagadi imota ezingekho emthethweni ngoba zicina zibangenisa engozini ezitshiyeneyo. Abesifazana balakho ukudlwengulwa loba ukubulawa lamadoda lawo alakho ukulinyazwa ngabantu laba bezimota.
“Kuzulu jikelele ngithi katshiyane lomkhuba wokutshontsha lobudlwangudlwangu ngoba umthetho uzababopha,” kutsho uInsp Ncube.
Uphethe ngokucela uzulu ukuthi aphathise amapholisa ngolwazi abayabe belalo ngezephula mthetho kundawana zonke lapho abakhona.
“Abantu kabahambe ngesikhathi esiqondileyo njalo balandele imithetho yeCovid-19 ngonanzelelo ngoba umthetho uzabafinyelela lapho abawephula khona,” kuphetha ulnsp Ncube.
