uMthunywa
Thokozile Mbedzi
INHLANGANISO yeVeterinary Services isikhuthaze abafuyileyo kundawana zonke zelizwe ukuba baqaphele umkhuhlane wensumpa ohlasela inkomo.
Kubikwa insumpa zandise ukuhlasela inkomo ikakhulu ezileminyaka engaphansi kwemibili.
Ekhuluma lentatheli kaMthunywa uDokotela wezifuyo uNdabezinhle Mkhwananzi uthe umkhuhlane lo, ubangelwa ligcikwane njalo ufana lemvukuzane enkomeni.
“Umkhuhlane wensumpa ubangelwa ligcikwane njalo yimvukuzane yenkomo. Uhlasela ikakhulu inkomo ezileminyaka engaphansi kwembili.
“Insumpa lezi zingaphuma loba ngaphi komzimba wenkomo kodwa enyaweni kukalutshwana. Kuyatshiyana ngobukhulu, kwesinye isikhathi ifana le-peanut, ezinye ziba nkulu njenge-cauliflower,” kuchaza uDkt Mkhwananzi.
Uthe nxa insumpa lezi zingaba zinkulu zicina ziphuma igazi elilephunga elibi futhi ziyabe zingasakhuli kuhle ikakhulu ezincane.
“Inkomo elensumpa kuyabe kudingeka ukuthi iyehlinzwa kukhutshwe lezonsumpa. Kukanti ingahlinzwa kumele inikwe ama-antibiotics ukuze kwenqatshelwe eminye imikhuhlane.
“Inkomo zilakho njalo ukunikwa amajekiseni okwenqabela insumpa lezi,” kuphetha uDkt Mkhwananzi.
