uMthunywa
Ethel Ncube
AMAPHOLISA akoBulawayo akhuthaza uzulu ukuba ananzelele ingozi zokuthengiselana kunkundla zokuxhumana nanko asemanengi amacala abawachwayisisayo.
Isikhulumi samapholisa koBulawayo uInspector Abednico Ncube uthe ukuthengiselana kwabantu kunkundla zokuxhumana ezibalisa iWhatsApp leFacebook kuyingozi ngoba kungaba lokuqilana.
“Ukuthengiselana kuWhatsApp lingazani kuyingozi ngoba lamasela lawo ayajoyina amaqembu eWhatsApp ukuze azwe yonke imbiko ekhulunywa lapho.
“Kuyenzeka ukuba kube lomuntu othi uyawoda impahla eSouth Africa kube sekusiba labaphathisayo njalo imbiko yonke le iyabe ifakwe kunkundla zokuxhumana, amasela alapho lawo ayabe esizwa. Alakho njalo ukuzenza abantu abafuna ukuthenga baqede batshontshe,” kubika uInsp Ncube.
Uqhubekele phambili eveza ukuba abantu kumele bananzelele nxa bethengiselana kunkundla lezi.
“Kunzima ukuthi wazi ukuba umuntu ojoyina iqembu kuWhatsApp lisela kumbe hatshi. Nxa kuvuma umnikazi waleloqembu kumele azi wonke umuntu ongena kuleloqembu ukuthi ngubani. Isibonelo nxa kuliqembu labathengisayo oqala iqembu kumele abekwazi ngamalunga ayo.
“Nxa lithengiselana liqaphele ingozi zokutshontshelwa kungakho nxa umuntu esenza ibhizimusi lawe ungamzwisisi bikela amapholisa ukuze sehlise ukutshontshelwa,” kuphetha uInsp Ncube.
