uMthunywa
Thokozile Mbedzi
AMAPHOLISA koBulawayo abika ukuba aqhube kuhle uhlelo lwabo lwe-Operation Sanity, obeluhlose ukukhipha imitshova engekho emthethweni edolobheni.
Lokhu kuza kulandela ukukhonona kwabantu ngesiphithiphithi semitshova emgwaqweni ka-6th Avenue lakwezinye indawo esezigcwele izimota ezithwalelwa abantu, ikakhulu ngama-Honda Fit.
Izimota lezi sezidume ilizwe lonke ngebizo elithi “Imishikashika”.
Amapholisa athe athethe inyathelo lokuthi abatshayeli bengamisi izimota zabo lapho abafuna khona njalo kumele balandele umthetho ngokudinga amachence okusebenza.
Isikhulumi samapholisa koBulawayo u-Inspector Abednico Ncube uthe okwenze baqhuba kuhle i-Operation Sanity yikubambana lomphakathi lamabhizimusi.
“Amapholisa aku-Operation Sanity enzikini yedolobho lakoBulawayo, lapho alwisana lemota lezi ezaziwa ngokuthi yimishikashika. Izimota lezi zithwala abantu lapho okungavunyelwa khona, ikakhulu ku-6th Avenue. Kulindawo akusahambeki. Sekusiba nzima kwabanye abatshayeli ukuthi basebenzise umgwaqo lo,” kutsho u-Inspector Ncube.
“Kuhlelo lolu, amapholisa asebenze ndawonye lenhlangothi ezikumabhizimusi, i-support unit lomphakathi ukuze balwisane lemota zemishikashika lezi. Kusukela siqale i-Operation Sanity le sibophe imota ezedlula ikhulu lamabhasi atholakale ethwala abantu lapho okungavunyelwa khona.
“Sinanzelela ukuthi imota lezi yizo ezisetshenziswa ukudala amacala atshiyeneyo, yikho nxa abatshayeli bazo bebona amapholisa bebaleka ngesiqubu. Lokhu kufaka impilo zabantu engozini.”
Uthe bakhuthaza uzulu ukuthi engagadi izimota lezi.
“Uzulu kangagadi imota zemishikashika ngoba zisetshenziswa ukudala amacala. Sithole imibiko yamacala amanengi adalwe ngabatshayeli bezimota lezi. Abesifazane labantwana bayadlwengulwa ngoba begade imota lezi bengazi ukuba zitshayelwa yizigebengu.
“Ezinye zisetshenziswa ukuthwala inyama etshontshiweyo. Abanikazi bezimota kumele babone ukuthi baqhatsha abatshayeli abalamachence,” kutsho u-Insp Ncube.
