uMthunywa
Wayne Ncube
IDLALADE ebelilindwe nguzulu ngamehlo abomvu eliphekwe ngobunono obukhulu liqembu elibizwa ngokuthi Abafana bakaMzilikazi lizakwethulwa ngoMgqibelo kuyonale iviki.
Idlalade leli elilengoma ezingu-13 ngelesithupha njalo limumethe ingoma ezilemfundiso ngezothando kanye lakwabatsha, lizakhutshwa eThembisa kweleSouth Africa mhlaka 9 Lwezi.
Ekhuluma loMthunywa okhokhela iqembu leli, uDoit Nkomo uthe idlalade labo elitsha elithi “Qaphela” liyababa.
“Sijonge ukuthi umnyaka lo uphele ngomfutho, kungakho sizakwethulela abantu bakithi idlalade lethu elithi Qaphela kumcimbi esizakuba lawo njalo eTsholotsho Centre mhlaka 31 Mpalakazi.
“Sifisa ukuthi abantu bakithi lapho esakhulela khona basibone mathupha sihlabela ukuze babone ukuthi siyakwazi mpela esikwenzayo,” kuchaza uNkomo.
Iqembu labafana bakaMzilikazi lilamalunga alitshumi agoqela, uDoit Nkomo, Newman Tshuma, Lethu Mvundla, Ayanda, Maqatha, Matasa, Sbusiso, Sandile, Snesipho kanye loManelisi.
Idlalade elizakwethulwa ngoMgqibelo lilandela elaphekwa ngomnyaka ka 2017 elithiwa ‘‘Usizi’’ kodwa kulelidlalade Abafana bakaMzilikazi baguqule umculo wabo bawenza waba ngojabulisayo, ofundisayo lapho abasebenzisane loKhaya, Thembi, iRevive, Dibi kanye loMxolisi umculi we-rhumba kuthi eGoli basebenzisane loBakhulule kanye loQiniso okuphinda kube yibo ama-producer edlalade leli.
“Iqembu lethu selikhule kakhulu ukwedlula ekuqaleni ngoba sesenelise ukuzakhela udumo eMzansi kanye lalapho esidabuka khona eZimbabwe.
“Kungoma lezi ezilitshumi lantathu abalaleli kabaqapheli ingoma ezithi Dali, Uthando lwakho lethi Jerusalem ngoba zingoma ezilemilayezo eqonde ebantwini, njalo sikhangelele ukujabulisa abantu emitshadweni eminengi ngesikhathi sekhefu,” kulandisa uNkomo.
UNkomo uphethe ngokuthi lezinsuku sebeziphilisa ngokuyatshaya emicimbini etshiyeneyo efana lemitshado ngoba lezinsuku abantu kabasathengi amadlalade, sebemane nje baphoselane izingoma kubomakhalekhukhwini.
