uMthunywa
Blessing Moyo
INHLANGANISO ebona ngezokulima eye-Agritex isikhuthaze abalimi ukuba balime i-broccoli ngoba kayihluphi ngesikhathi somqando.
UNkosazana Treggy Mpofu oyingcitshi kwezokulima kunhlanganiso ye-Agritex uthe i-broccoli yenza kuhle kakhulu ingalinywa khathesi futhi inika umlimi imali enhle emkambo ingaqala ukulinywa ngoNkwekwezi.
“I-broccoli ikhula kuhle endaweni ehlaba ilanga ngakho umlimi kumele aqinisekise ukuthi indawo yakhe alima kuyo ilelanga elifaneleyo ukuze isilimo sikhule kuhle.
“Umlimi kumele abone ukuthi umhlabathi afuna ukuhlanyela kuwo ulobumunyu obuphakathi kwe-6,0 le 7,0 ukuze isilimo lesi sikhule kuhle.
“Umhlabathi ofanayo kumele ube ugcina amanzi njalo kumele ube lokudla okunengi ukuze isilimo sikhule kuhle,” kuchaza uNkszn Mpofu.
uNkosazana Treggy Mpofu onguHorticulture Specialist
Uchaze ukuba kuqakathekile ukuba umlimi afake umquba esilinyweni sakhe ukuze senze kuhle.
“Ukuze kube lesivuno esihle umlimi kumele afake umquba uhlale emhlabathini amaviki amabili engakalimi. Amagodi lapho okufakwa khona inhlanyelo kumele abe eyi-1cm ukutshona abesetshiyana nge-5cm emzileni,” kuchaza uNkszn Mpofu.
“Kuqakathekile ukuba umlimi afake imihlobo yonke yomvundiso ukuze isilimo sakhe sithole ukudla konke, ifethalayiza ele-nitrogen, phosphorus le-potassium.
“I-nitrogen ikhulisa kakhulu amahlamvu kukanti i-potassium le-phosphorus ikhulisa kuhle ijodo okuyilo elivunwa ngumlimi yingakho kuqakathekile ukuthi inhlabathi ibe lokudla okwaneleyo okutshiyeneyo.
Uphethe ngokukhuthaza abalimi ukuba bengavilaphi ukuhlakulela izilimo zabo.
“Umlimi kumele ahlale ehlakulela isilimo sakhe ukuze kungabi lokhula njalo lokhu kwehlisa ukutshisa komhlabathi,” kuphetha uNkszn Mpofu.
