uMthunywa
Intatheli kaMthunywa
ISIZINI yomdlalo kanobhutshuzwayo kuleli izaqala ngemva kwamalanga angu-60 njalo lemidlalo yonke yomqhudelwano we-Africa Cup of Nations isiyedluliselwe phambili.
Lokhu kuza kulandela ukuqhamuka kwegcikwane le-coronavirus (Covid-19) lokuphawulwa kombiko wenhlanganiso yezempilo emhlabeni iWorld Health Organisation (WHO) ukuthi igcikwane leli selimemetheke umhlaba wonke.
Kuleli ezemidlalo zimisiwe nanko phela loMongameli welizwe uEmmerson Mngangagwa ngoLwesibili uthe imbuthano yabantu abedlula ikhulu ayisavunyelwa njalo lokho kugoqela ezemidlalo. Lesi yisinqumo esizatshintshwa ngemva kwamalanga angu-60.
Iligi yeCastle Lager ibikhangelelwe ukuthi iqale kulinyanga.
Imidlalo ye-Afcon engu-48 ibizaqala ukudlalwa kusukela mhlaka 25 kulinyanga kusiyafika mhlaka-31 enkundleni ezehlukeneyo emazweni ase-Africa.
Eminye imidlalo emisiweyo igoqela le eyemqhudelwano yokukhankasela ukuyadlala ku-Fifa Women’s U-20 World Cup ebizadlalwa kusukela mhlaka 22 kuyonale inyanga kusiyafika mhlaka-29.
Kubikwa njalo lokuthi lemidlalo yeTotal Women’s Afcon 2020 ebikhangelelwe ukuthi ibengoMabasa, isedluliselwe kwelinye ilanga.
Kumbiko ethunyelwe intatheli kuliviki, inhlanganiso yeConfederation of African Football (Caf) ithe akulanto engayenza ngaphandle kokuba ilandele isinqumo samazwe lese-WHO.
“Emuva kokuqonga kwegciwane iCovid-19 lokuchazwa kwalo yiWHO ngokuthi limemetheka okomlilo wequbula emhlabeni, inhlanganiso le ithathe isinqumo sokumisa imqhudelwano yonke”.
Inhlanganiso ye-Caf ikhipha lumbiko nje isanda kuxwayisa amazwe ukuthi aqaphele igcikwane le-Covid-19 ngelihlo lokhozi.
Ngokunjalo le-WHO ayikakhulumi ngokugcweleyo ukuthi izwekazi le-Africa lisengozini.
I-Caf iphinde yathi ukuqhutshwa komqhudelwano we-Total African Nations Championship (Chan) obekumele udlalelwe eCameroon lonyaka, kuzaphumelela nxa sebethole izwi elivela ku-WHO.
I-Chan ibikhangelelwe ukuthi idlalwe kusukela mhla ka-4 kusiya ku-25 Mabasa.
Isinqumo seCaf silandela leso esezinye inhlanganiso zikanobhutshuzwayo emhlabeni ezifana le-Uefa esezimise imidlalo ye-Uefa Champions League leye-Europa.
Lezinye inhlanganiso eziphethe umdlalo eze-Serie A, English Premier League leLa Liga Satander sezinqume ukumisa imidlalo yazo.
Ngokunjalo, kusalindwe ukuthi iZimbabwe Football Association le-Premier Soccer League zikhiphe umbiko ofanayo.
