uMthunywa
Mehleli Dube
SEKWABA lenkulumo ejwayelekileyo ethi musa ukungikhipha emoyeni ungifake enyameni, kahle kahle itsho ukuthi umuntu uyabe umphambula kubuThixo umdonsela endimeni kaSathane yebubini.
Kuvamile lezinsuku ukuzwa sekuthiwa umfundisi webandla thize kumbe umphurofethi othize sedale ihlazo. Zimbili nje izinto ezibathela emanyaleni ufice sebesenyanywa ngumhlaba, yimali labosapho luka Eva.
Kuyakuthi sebevule amabandla abo badume okwamagama ngoba bethi bapholisa izifo ezithize ezihlasela abazalwane. Afike umzalwane wesifazane, ecwebezela, emuhle okwenyanga ekhanyela emanzini esiziba esilengwenya. Phela abanye omama bayazala, athi umphurofethi efaka izandla zakhe ekhanda lakhe emkhulekela ezwe kuqaqamba inhliziyo kumehlule ukuyinqanda imizwa aze atshengisele langamehlo esephuphuma uthando, uzwe esecelwa ukuthi umzalwane lowo asale, ukuze akhulekiswe ensitha, vele wazi ukuthi seliwuchithile umuthi inkonyane.
Kwesinye isikhathi uzwe sekuthiwa sokumele kuhanjwe laye enkangala kumbe phezu koqaqa ukuze kungabi lalutho oluzaphazamisa umkhuleko, bakhohlwe ukuthi lenyoni lazo ziyaceba ngenkwelo zazo ezitshiyatshiyeneyo bamangale sebephuma kubomakhalekhukhwini sebebonwa ngumhlaba wonke. Ngikhumbula omunye udade owayehlutshwa yinzalo kwahanjwa laye entabeni kwafikwa kwathiwa kanqunule asale ngesudu yakhe yokuzalwa, ekhulekiswa ebanjwa lezitho zasensitha, wezwakala esehlaba umkhosi umphurofethi esefuna ukuzithaphela inyosi engelamvumo. Lendodana kaNkulunkulu yathi ilaya abafundi bayo, kayizange itsho ukuthi libakhulekele benqunu.
Sibezwa ukusa kwamalanga emisakazweni abanye sibabale kumaphephandaba sebeyitshaye bayibhuqa imali yebandla, sebethenge uvava lwemota olubelethe isondo kumbe sebezakhele izindlu emasabhabha abazalwane besidla imbuya ngothi. Kwamanye amabandla inkokheli zakhona umnikelo ziwufuna kungamadola eMelika kumbe amaRandi, eyakwelakithi abayifuni, unganikela ngayo bakukhangela ngelihlo lengwe edlelwe imidlwane zimpisi, ewatheni.
Abanengi sebavula amabandla abo benxwanele yona imali ekhitshwa ngabazalwane ufice umuntu esetshintsha amasudu abucwazicwazi ehamba phetsheya kwamazwe ehanjiswa ngazo imali zabakhonzi.
Kasingaphumi emoyeni ukuze sikwazi kamhlophe ukulandela imiyalezo yogwalo olungcwele lona iBhayibhili.
Ayixabene. 0738305027.
