uMthunywa
Mehleli Dube
KUVAMILE lezinsuku ukuthola usapho lukaEva lumhlophe ebusweni, ebomvu ecwebezela, kuthi intamo lengalo kumnyama angani ngumuntu okade ezithukuza emsizini.
Angazi ngubani owatshela inengi lalolu sapho ukuthi ungababomvu kuthiwe umuhle, uthola iqhikiza, itshitshi lentombi ngolimi lwabondlebe zikhanyilanga bathi yi-black beauty, esezipende waba ngokunye. Abanye amafutha abawagcobayo okuziphendula umbala webusweni ungahambelani labo ufice umntanabantu esephenduke waba ngokunye.
Abanye ngabawagcobayo kuthi ngokuhamba kwesikhathi aswele imali yokuthenga lawo mafutha atshintshe umbala, wena owabona ingulube yeganga idlalela edakeni ungazi ngcono. Phela ukuzitshintsha umbala kuza lendleko ezithile, umuntu wakhona angaginqa uthola izithukuthuku zakhe zilembala etshiyeneyo sokungani ngumchilo wamakhosikazi ngenyanga kaMpandula.
Azone ijwabu lakhe umuntu ethi uzama ukukhanda engezelele ubuhle bakhe akhohlwe ukuthi phambi kukaMdali akula muntu omubi, inhliziyo yomuntu nje kuphela yiyo embi.
Omunye amale lawo mafutha uthole esetshwabhene engazi ukuthi yikho singabantu abamnyama sibahle sinjalo. Nxa uyake ubone amatshitshi esintwini esevunule ezomdabu kulomthimba, ufice zizinhle intombi, zithi nxa zimoyizela zindiyazela ufice amabhungu eseveze elenja lenhliziyo zabo sezigcwele amakhaza.
Ye, umzimba ngowakho, ungenza loba yini okuthandayo kodwa yazi kuthi lapho usugugile kumbe usuphelelwe ngamasheleni uphenduka ube ngokunye, kuvamile ukuzwa labesilisa bethi ungabona ethanda ukuzicombacomba kanengi lontombazana uyabe ekhuthele emadodeni ngoba lokungcola engafuni.
Zigcobele amafutha avikela ijwabu lakho ukuthi lingadabuki hatshi ukuthola ngapha ubomvu ngangxanye umnyama ufuna bona lobo buyelo bhoni. Ayixabene. Mehleli Nkunziyembongolo Dube 0738305027
