uMthunywa
Mehleli Dube
LE yinkulumo ejwayelekileyo nxa udade ethe watholana lendoda yakhe, ebukwa ingelanotho ethize.
Ye, imali yiyo insika lendikimba yempilo, ngoba phela yona yenza izinto zibelula. Uzwa bethi uyamthini uqhwayilahle, ugeza sidle, ukhamisa ngithele.
Into esisuka siyikhohlwe yikuthi yona ayisuthwa, angaze umuntu abelamaqubaquba umuntu uhlezi efuna ukwengezelela.
Bakhona obabakazi abathi nxa betshelwa ngabantwana babanewabo ukuthi sebezitholele ijaha, babuzisise ngalapho asebenza khona lemali angabe eyihola, kwesinye isikhathi kuze kucubungulwe umdeni wonke wakojaha ukuthi ngabantu abalani emhlabeni.
Kumdide, kumephule umoya wakhe udade ngoba yena ezithandele umuntu wakhe, phela uthando bathi luyisiphofu.
Njengoba ngitshilo ngaphambilini ukuthi imali yingxenye yempilo zethu, ngoba esikhathini esinengi olemali nguye olalelwayo, loba esekhulume umbhedo ongakanani, labaphuza ugologo, uthola umdodovu wekhehla lithunywa ngontanga ukuyathenga ngoba lingelayo imali.
Kodwa into eliyitshelwa ngobabakazi yikuthi leyo mali abayiqakathekisa kangako uyabe wayithathangaphi umuntu, ngoba iyasetshenzwa, kayivuki ikhona njengamakhaza.
Uthando lweqiniso alulandaba lamaqubaquba emali, bakhona abangelayo enengi abaziphilela kamnandi, bephuphuma injabulo lentokozo ezindlini zabo, baphinde babekhona abagomela emini lebusuku ngoba imali isibokhele amalahle ekhanda.
Abanye ngebatholisa imikhuhlane engelaphekiyo ngoba bengasasuthiseki ngekhosikazi linye kubathume kogoqanyawo.
Ungaze uzwe bemeyisa umuntu wakho, mthande ngamandla, okusemqoka yikuthi umthombo wothando uhlale ugobhoza, ubasela lenjabulo enhliziyweni zenu.
Ukujabula kwenhliziyo kuvimbela imikhuhlane. Kuzakusiza ngani dade ukuthi abelayo leyo mali kodwa ebusuku lemini utshona uchiphiza izinyembezi, uthole umqamelo usumanzi te angani kusendlini yegagu.
Into okumele ubeyazi dade yikuthi imali enhle ngeliyisebenza lonke ngezandla zenu, kungakhathalekile ukuthi othole enengi ngubani, leyo uyifaka izinyo ukhululekile, kulaleyo oyithola iyinqwaba ozabulokhe uyibaliselwa ize ikuhitshise ngamathe.
Empilweni kumele wazi ukuthi imali iyaphela ingadliwa ingasetshenzwa, banengi asebebizwa ngelikakhanka ngoba bengaselayo, kodwa kwakusesatshwa sibi sezisinde zabo.
Ayixabene.
Umlobi uthinteka ku0714355641
