uMthunywa
NGIYANGIZWE ezimfeni, emabhasini loba kuzindwendwe emabhanga abantu befuna ukuthatha izimali zabo kukhulunywa ngayo imithandazo.
Loyabe engayanga enkonzweni yakhona ngiyangizwe belayezelana abazalwane ukuthi amphathele eyakhe.
Ngikhumbula abanye omama engangigade labo ibhasi mina ngihlezi esitulweni esingemuva kwabo bezixoxela bengagqize qhakala, ngoba belesiqiniseko sokuthi ngingaze ngizwe abakuxoxayo ngizakuthini nanko bengangazi, njengoba ukwazi lawe ukuthi indlebe ayilasivalo ngakuzwa konke ababexoxa ngakho ibhasi isidla umango.
Babexoxa ngomunye umngane wabo owayelomkakhe owayesebenza eGoli. Wayebanjwe lenye indoda wayadinga leyo mithandazo yamatshe amathathu elinye kwathiwa alifake ngaphansi kombheda, elinye alifake entubeni yomuzi elesithathu akhudumeze amanzi athathe imvunulo yomkakhe yangasese abeseyigxamuza phakathi qede lawo manzi apheke ngawo isitshwala amnike.
Isitshwala
Phela lokhu babethi kwenzelwa ukuthi imamba ingalivusi ikhanda ithi dacalala okwenhlathu yamanzi eginye inqina ekade lizonatha esizibeni.
Ngaphosa ngangenela ngibuza ukuthi kusese yisiphurofethi loba ubuthakathi ngase ngikhumbula ingoma yamasololo ethi ubobheka ezakho uyeke ezabanye.
Kukanengi mhlawumbe lawe ubona abantu bethi bangavelelwa ngokubaphicayo bagijimele kulabo abanika amatshe amathathu bethi yimithandazo.
Ngikhumbula elinye isela elalidumile ngokweba izifuyo zabantu lathi mhla libanjwe ngenye imbumba yezakhamizi ezazilwisana lokwebiwa kwezifuyo balithola ezambeni zalo lilayo leyo mithandazo yamatshe amathathu.
Lalo lelo sela laliyithethe ebaphurofethini, kodwa eyalo yayingeyenhlanhla ukuthi lingabanjwa njalo lingaze libanjwe lingaya emthethwandaba litshelele okwenyeluka iphunyuka umgoli wenhlanzi.
Into engazibuza yona yikuthi incwadi eNgcwele ekaMvelingqangi ku Ekusodasi kumithetho yakhe elitshumi ukhona osixwayisa ukuthi ungatshontshi pho-ke lo umphurofethi onika isela imithandazo ukuthi lingabanjwa litshontshe ngamandla ngahle ngayifunda ivaliwe ukuthi kutsho ukuthi yilaba abaphurofethi bamanga abatshiwo yilo iBhayibhili.
ibhayibhili
Manengi amadoda asephenduka imipankwa emizini yawo ngenxa yale mithandazo yamatshe amathathu.
Ayixabene.
