uMthunywa
Mehleli Bube
KWATHI ngempelaviki singcwaba umgulukudu, ugeva kumbe ngithi unkunzi mavava wesela, babezile abantu beNkosi ngobunengi beyinyelane, eqinisweni babengazanga ukuzokhalela kodwa ukuzoba lesiqiniseko sokuthi ngempela linswelaboya isithungamele ezweni lemithunzana.
Lujaha wahlupha lapha ekhaya kwaze kwathi ngoba amapholisa alapha ekhaya angakuthungatha balala bekudobhile, watshungubala imingcele waya kweleGoli, wafika ngale wathwasa kakutsha ngoba bathi nguye owayengumkhulu weqembu lezigelekeqe ezazisesatshwa langamapholisa kaRamaphosa.
Kuye ukuchitha umphefumulo womuntu wayengakuthathi mango, kwakufana nje lokuwisa iqanda egumeni lesamende. Wayengakhethi ukuthi ukhuthuza nhloboni yomuntu, abansundu, amabhunu, amaJuda lamaNgisi.
Wayethi nxa efuna ulutho emuntwini ungenqaba lalo wawuyabe uzokhela ithunzi lokufa, lozama ukuphazamisa imisebenzi yakhe wayekhuzwa ngokwemukwa umphefumulo, wawuzwe nxa ephumelele ebuseleni bakhe, ethi lapho adlula khona balala phansi banganyakazi.
Njengoba abadala batsho ukuthi akuqili lazikhotha emhlane njalo kwelinye ilanga indwangu iyalukhutha ugatsha, wathi ezama ukugqekeza ebhanga khonale eGoli bahle batshaya ikhanda basakazeka ubuchopho esitaladeni kwangani ngamaputi.
Mhla engcwatshwayo kwezwakala umfundisi webandla elalikhethiwe ukuthi likhokhele umngcwabo, emncoma loba nje wayengamazisisi, mhlawumbe wayelandela isitsho esithi ofileyo kalacala.
Kwazwakala abantu bengunguna kwaze kwaphumisela umdala wami uDlomo wathi musani ukufeketha ngalo mkhonyovu ngoba banengi abangela bazali ngenxa yakhe.
Umfundisi laye washesha wafiphaza intshumayelo yakhe esebonile ukuthi abantu sebethukuthele.
Ayixabene. 0714355641.
