Uncategorized

Phos’ elakho : Mina ngikhuleke, ukuthi kutheni!

12 Sep, 2019 - 00:09 0 Views
Phos’ elakho : Mina ngikhuleke, ukuthi kutheni!

uMthunywa

BANENGI abantu abazonda bagane unwabu, kungathiwa bakhuleke emphakathini. Kuvamile ukuthi nxa umuntu esakhomba ngophakathi, angabi lendaba lokukhothamela uMdali.

Kwakuthi nxa esevelelwe yinkinga, kulapho akhumbula khona ukuthi kuloMvelinqangi. Kwandile nxa umuntu esegula, esebangwa lezibi, uzwe esecela yena mathupha ukuthi abizelwe umfundisi yingqe ngowaliphi ibandla amenzele umthandazo elethemba lokuthi uzamsondeza eNkosini.

Uthola umuntu eklamasa, eqolotsha okwenkonyane yenkonkoni esuthi uchago ngesikhathi sehlobo. Ngikhumbula omunye ubaba owathi ecelwe ukuthi asivalele ngomthandazo ebonga abantu ababezile emthimbeni, wakhuza wababaza, ethi kungani kukhethwe yena.

Empilweni akula muntu ongakwaziyo ukuthandaza, kakhulu abanengi sikhumbula ukuzisondeza eNkosini, nxa sithe sawelwa ngamashwa.

Nxa umuntu kusamhambela kuhle uyakhohlwa ukuthi uyisidalwa sikaNkulunkulu, loba iNkosi imenzele okuhle, usuke azibone angani ukuthole ngokuhlakanipha kwakhe.

Lalabo abathi bangamakholwa ufica labo bethandabuza ukuzisondeza eNkosini, bafune ukuthandazelwa ngumfundisi.

Kubalulekile ukuthi lapho okhona loba usukhomba ngophakathi kumbe udla luklubhu khumbula ukutshaya phansi ngedolo ucele ofuna uMdali akwenzele khona kumbe ubonge athe wakwenzela okuhle.

Uzafica ukuthi loba sekuthiwa khuleka emphakathini ungakuthathi mango ngoba uyabe ukujwayele. Nxa wake wavakatshela isihlobo sakho entolongweni, zonke izikliwi lemigulukudu yezidlova ufica zithi sezizelwe kakutsha, imvama ziwahutshuza aluhlaza tshoko, bethi bangaphuma ejele baqhubeke ngobuhulukuqu babo.

Funda ukuthandaza loba ungaba sekujabuleni kumbe enkingeni.
Ayixabene.
Ungathintana lomlobi kunombolo ezithi 0714355641.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds