KULENGOMA yomhlabeleli welizweni laseSouth Africa ethi intsha yalamhlanje inengi labo abakwazi lapho abayakhona lokuthi bafunani empilweni zabo.
Nxa ufuna ukuzibonela mathupha ukuthi lomhlabeleli wayengaphosisi kodwa yinto ayeseyibonile ngena endaweni zokuphumula lapho okunathwa khona uzahlangana lembila zithutha, ungathola lapho abagida khona logida amantshomane usala phansi.
Kuyabe kuseqiwa uthole umuntu eseginqe ngapha ephethe okuyisigujana kwenjengu elokhe esithi goje. Lokuthi umlayezo wengoma uyabe usithini abalandaba lakho bona bathi bachazwa ngamakatali, kuyabe lokhe kuphunyelwa phandle umuntu ephafuza insango adakwe uthole amehlo esebomvu gebhu angani ligazi lentondolo okufuna ukuphekwa ngabo ububende.
Kungavele kudlule umuntu wesifazane eduze bavele bamdumele bakhohlwe ukuthi licala elikhulu ukubambana lomuntu ngaphandle kwemvumo yakhe. Kambe umuntu umkhombisa udakiwe ngeke akuthathe njengomuntu oleqiniso.
Ensukwini zezolo thina sikhula kwakungavamanga ukuthi nxa usizibika entombini uhambe unuka utshwala kumbe igwayi, wawukufihla konke lokho ethi ekubuza ukuthi uyanatha ulandule uze uwahutshuze amanga aluhlaza usuqamba lokuthi ungena ibandla thize lenkonzo. Pho abakulezinsuku ngenxa yokungazi ukuqomisa abancengi, uzwa umuntu wakhona ethi uyazimangalisa angani uvela eLandani kambe ungathi umuntu ngapha uyamethuka ngapha ucela uthando ngodlame.
Intombazana nxa iqonyiswa bontanga kumele ube limi mnandi njalo ucwebezele hatshi ukuhamba usiyaqomisa ungcolile sengani ngumuntu akade ekhuma isidabhula semolasisi ephiwa inkomo emapulazini. Inengi labo ungezwa ethi ukhonjiwe uyabe esihohobisile isalukazi esingasela sawudo.
Abanye njalo ngabathatha kakhulu izidakamizwa kuvele kubathene angazabe esaba lendaba yokuqomisa avele aphenduke inkabi yona engaxotshiyo. Ngikhumbula omunye umakhelwane wami wayemangaliswa yikuthi indodana yakhe ihlala idakiwe futhi kayilandaba sibi sokudla kulokuthi azithengele ukudla okuzakwakha umzimba wayegijimela utshwala bona obabumcoba umzimba umthole eselenga angani yinyoka yothamele ilanga iphezu kwesihlahla somdlawuzo.
Lapho ayethola khona imisebenzi le eyesikhathi esifitshane ama-piece job babethi nxa bephuzile ukumbhadala avele athi kumele bambhadale ngotshwala, nxa bungakapheli wayengabuyeli emsebenzini wakhe.
Ngiyangizibuze ukuthi njengoba inani lentsha efana lalabo engikhuluma ngabo lisanda kuyaphetha ngani? Safa isizwe.
Ayixabane.
