uMthunywa
WONKE umuntu lumfanele uthando, laloba sokwenzakaleni emuva kodwa ithuba lothando kumbe lokuthandwa ma lifika akekho ongafisi ukulamukela ngezandla zombili.
Kulezinsuku esiphila kuzo abantu bayehlukana sebezele, ekwehlukaneni kwabo abanye abantwana bayasala lobaba ikanti ke abanye basuka bahambe lonina kibo.
Ngokutshiyana kwemdeni ma owesifazane sebuyele labantwana kibo abanye bagcinwa yizihlobo, ikanti abanye baqhubeke begcinwe ngunina. Kuthi ke unina nxa esesiyakwendela kwenye indawo kuyenzeka ukuthi ahambe labo abantwana emendweni wakhe omutsha.
Labesilisa labo bayabhekana lomumo ofanayo, bayangena kweminye imitshado belabanye abantwana.
Akulanto entsha kumbe embi ngokuthatha usulabantwana kumbe ngokuhamba labantwana ekwendeni, uhlupho luba khona lapho labo bantwana sebengena phakathi kwabazali okucina kubangela ukungazwisisani lokuxabana.
Umbuzo ubususithi, “Bakhuzwa bethiweni labo bantwana ekhaya?” Phela njengobaba lapha ekhaya sungathi uyamkhuza umntwana kube angani uyamzonda njalo uyamhlukumeza, kumbe uthi uyakhuza njengomama kube sengathi usungu–stepmother olochuku.
Kumumo onje abantwana abanengi bakhula bengaqoqekanga abanye babe ngamahlongandlebe ngoba abazali besesaba ukuqoqa lokukhuza njengokumele kwenziwe nguye wonke umzali.
Kanti yena umntwana vele ngokabani? Ngubani okumele abe ngumzali emntwaneni? Ngubani olelungelo lokukhuza umntwana? Asebelenwele ezimhlophe bazavumelana lami ukuthi kudala umntwana ubengowesizwe, ubengowesigaba. Wonke umzali esigabeni ubengumzali kuye wonke umntwana okhona esigabeni.
Umntwana ubethi nxa ephambanisa esemphakathini umzali oseduze ubemkhuza, kuthi nxa kudingeka ukuthi amdonsele ngemva kwedwala amkhuphe ubuwula ngoswazi ubekwenza lokho.
Lowo mntwana okhuzwe njalo ubengeke afike ayithi vu langakibo ngoba bekungenzeka lukhale futhi olunye uswazi. Kanti manje kuyini okunzima ngokuthi ubaba kumbe umama ohlala lomntwana amkhuze?
Nxa umntwana eselihlongandlebe ngubani ohlukuluzeka kakhulu?
Yebo sisesikhathini lapho wonke umuntu oselamalungelo, kodwa amalungelo kawasusi umlandu womzali wokukhulisa umntwana ngendlela eqondileyo.
Khumbula, nxa ukhulisa umntwana kuhle awenzeli wena kuphela, kodwa wenzela, isigaba, ilizwe, lomhlaba wonke jikelele.
Izaga 22 vesi 6 uthi yena “Fundisa umntwana ngokwendlela yakhe; ngitsho esemdala kayikuphambuka kuyo.”
