Mehleli Nkunziyembongolo Dube
UKUPHELA komnyaka kuletha injabulo lentokozo kunengi labantu. Izimiso lezinqumo zomuntu kuvamile ukuthi umuntu abone ukuthi ukufezile lokhu akade ekuhlela ekuqaleni, laphakathi komnyaka. Minengi imihloliso ebhalwa ekupheleni komnyaka, abafundi baginqa babe manzi te, belungiselela leyo mihloliso.
Abanye ngabadlalayo phakathi komnyaka kuthi sebebona ukuthi isikhathi semihloliso sesisondele, ufice sebamatasatasa bebambe lokhu lalokhuya. Wena owake wabona ichalaha liphembela umkhondo webhalabhala eledlule kuthange, ufica umuntu esedobha lolugwalo abeke loluya acine engazi into ayenzayo.
Yisikhathi esinzima kakhulu kuzitshudeni ezinengi ezibhale imihloliso ngoba kuyathi umnyaka uqalisa ziphume impumela. Lesisikhathi kuze kuyephuma impumela kufuna ukuzibamba, uzithibe ngoba izilingo zinengi kakhulu, ngoba nxa uthe wenza iphutha ungakhala okwempilo yakho yonke. Bakhona abangane abazakuyenga bakufundise izidakamizwa, hlehlela kude labangane abanjalo, kungabangcono utshone ubukele umabonakude kumbe uzidlalisela umakhalekhukhwini wakho.
NgeSonto ugeze uye enkonzweni uyokuzwa amazwi angcwele wona azakuthintha akungenise emhlambini olokulunga lokuzithoba hayi kulabo abayabe bephaphatheka kungani ngubhejane owethuswe yisihlahla esiwiswe yisavunguzane sikaNtulikazi.
Abanengi impumela seziphumile bazabe bengasaqhubekela phambili ngezifundo sebezithwele izisu ezingelabanikazi ngenxa yokuthi uyabe wazithwala ephuze umbambangqondo ugologo. Kube buhlungu usubona owawulabo sebekwelinye izinga. Phela kumele wazi ukuthi umuntu ongafundanga uyingozi kakhulu ngitsho lakuye mnikazi. Kungakho ngisithi akuhlonitshwe lalapho engayikwendela khona impumela zize ziphume kuqhutshekelwe phambili.
Ayixabene.
0738305027