uMthunywa
Mehleli Dube
KWAKUTHI nxa kuphume impumela zemihloliso ebhalwa ngabafundi ekupheleni komnyaka, kwabanye kube lokujabula lokuthokoza, kwabanye kube lokudangala, lenzondo ngoba besazi kamhlophe ukuthi izifiso zabo sezitshayelele emabondeni, ngeke besenelisa ukuqhubekela phambili ngezifundo zabo, okwaleso sikhathi.
Phela ukufeyila kuyinto eyangisayo kakhulu nxa usuziqathanisa labosowenu abayabe bephumelele. Abanye bakhale ngababalisi uzwe bethi umbalisi thize kakwazi ukufundisa, bakhohlwe ukuthi lowo mbalisi ufundisa nje ngoba wakuhambela ekolitshini.
Ye kwesinye isikhathi bakhona ababalisi abangamavila, ikakhulu laba abaphindaphinda ukubhala izifundo ze O-level uthole umuntu elezathifikhethi ezine ukuze enelise i 5 O-levels, yibo mhlawumbe abathola ukufundisa kusiba nzima ngoba laye uyabe waphumelela ngogodo, kube nzima-ke ukuthi achathekele izitshudeni ulwazi.
Ungakhangela njengemhlubulweni wesiNdebele zinengi izikolo ezingela babalisi bezifundo ezifana lezeSayensi, kufaka izitshudeni engozini, yempilo yabo yakusasa. Kwesinye isikhathi ukungaphumeleli kwezitshudeni kubangelwa yikudlala, lokuxotsha impala ezimbili kuze kufike isikhathi sokubhala imihloliso zicine ziphunyuke zonke abesefeyila.
Baphinde babekhona abazali abangela ndaba lokukhangela izifundo kumbe ingwalo zabantwababo, zivulwa nje umlandu uhle awugaxe kubabalisi. Kubalulekile njengomzali ukuthi umntwana umkhuthaze, ukuze laye athole intshukuntshu lamadlabuzane, aphumelele, ungabi ngumzali othi, “thina asifundanga kodwa siyaphila,” kuyabulala umdlandla emntwaneni.
Wawubone nxa ichalaha lithungatha umkhondo wenyamazana, ungabasela ngomlozwi leqa lize lime ngenyawo ezimbili. Lawe umntwana mkhuthaze, umthengele konke okumele akusebenzise esikolweni. Labozogatsha lwemfundo sicela ukuncediswa ngotitshala be-Maths leSayensi babekhona ezikolo ngoba balutshwana kakhulu, kubulala umhlubulo, ngiyalicela, ngiyalincenga. Ayixabene.
0714355641
