uMthunywa
BAKHONA abantu abathi befika endaweni kumbe esigabeni bazembese isigogo semvu yona eyaziwa ngumhlaba wonke jikelele ukuthi yinyamazana elungileyo baphinde njalo baveze elenja kanti bekulibazisa bethi lala lulaza sikwengule.
Umngane wami uDumo wathi mhla etshadayo umdeni wonke wamtshayela ihlombe umfisela inhlanhla yamaswazi, phela wayemuhle umakoti, wayethi nxa ebingelela aviyoce, abobotheke lawe uze uzibonele ukuthi nangu umntwana ozalwa ebantwini.
Kwathi ngokuhamba kwezikhathi esegxile impande, waqala ukutshengisa impawu zokuba lihlongandlebe. Phela inyoni evele ilokukhala kwayo ngeke uyiguqule, baphinde batsho ontanga ukuthi loba ingulube ungaze uyigezise uyipikle ngomfuma iyabuyela edakeni.
Kwahlalwa phansi bazama ukuthi bamkhuze obabakazi bakhe, wavusa umhlonga wakhwaza okwezulu lensewula. Wagila imikhuba eyayingazwisiseki, ubuntu ayefike ebembethe sebutshabalele njengamazolo ebalekela insaba zelanga likaMpandula.
Banengi abantu abathi befika kumbe bekhutshulwe emsebenzini ngensuku zakuqala azenze umuntu olozwelo njalo olesizotha kuthi ngokuhamba kwesikhathi zithwale luklubhu izisebenzi ezingaphansi kwakhe esezitshengisela ubungonyama bakhe yona ethi nxa ibulala inyamazana iqhobe lamathambo kungabi ndabazalutho.
Ye empilweni singaguquki umbala njengonwabu, asaziwe ngobuhle ukuze labafakaza ngathi bangadideki.
Umlobi uthinteka ku:0714355641
