uMthunywa
Mehleli Nkunziyembongolo Dube
Imfa yingxenye yempilo engajwayelekanga, ngenxa yezinhlungu lezindleko eziza zibelethwe yikho ukufa.
Kanengi siyasizwe kuthiwa kusalungiswa amaphepha okuthi isidumbu sibuye sivela emazweni esakhelene lawo, amanye asekudeni njalo amanye aseduze. Inengi sisawadla amabele sijinga sikhohlwe ukuthi likhona ilanga oyobizwa ungasabeli, usulele amathongo amampela.
Siyadlubulundela sichapha imingcele ngokusemthethweni, abanye njalo sitshungubale sichaphe ngovivi luka Magadalena esiyabheka iNkosi uJeso singabonwa muntu, singene emazweni abanikazi singagqize qhakala, siqolotsha okwethole lensengwakazi elifohlileyo zibuya chaka.
Sikhohlwe lokugcina incwadi zethu zokuzalwa, kumbe izithupha. Abanye sitshintsha lamabizo nxa sisemazweni abanikazi, sithathe lokuzincwadi kwemigunyathi, okuzakwenza umuntu aphile ngokudiza njalo nje, kodwa mhla udlula emhlabeni kusinde abaphilayo.
Nxa usuthe wadlula emhlabeni elizweni labanikazi, into abayidingisisa kakhulu yikuthi bakwazi ngempela ukuthi awusiso sizalwane sakwelinye ilizwe besesaba ukuthi bangathatha isizalwane sakibo basise kwelinye ilizwe. Ufice sokuhlupha emabhoda sebefuna isiqiniseko sokuthi ngempela ungowangaphi, lapho kuyabe sokufuna ukuthi omunye aze ekhaya azothatha incwadi zomufi ezokuzalwa lezithupha, lokho kuza lezindleko ezinengi, nxa kungela muntu olemali ukuthi ancedise ngemali.
Bacine bekhalala ukuzama imizamo. Bacine beziduduza ngokuthi akulamango ongela thuna, kuyafanana kangcwatshelwe khona, acine umuntu engcwatshwa ngamabhantinti kumbe ngabangane, angcwatshwe okomkhonyovu womdlembe, ongelamnikazi.
Ngapha ekhaya bayabe bebulele imbuzi mhlawumbe lenkomo ngoba phela sekwabalisiko ukuthi lapho okubuthana khona abantu kumele balale ngesibomvu bebhodlela phezulu okwebhubesi elijimbe ijongosi lenkonkoni ngesikhathi sehlobo, inkotha iluhlaza.
Lungisisa into zakho lamaphepha ukuze abantu bangathwali nzima ngawe, ucine ungcwatshelwa emazweni asekudeni esizehluleka lokuyafika sisiyaphosa ilitshe.
Singakhohlwa ukuhlaba phansi ngedolo sicele kuMdali umkhuhlane lo okhona uphele.
Ayixabene.
Umlobi uthinteka ku 0714355641
