uMthunywa
Basuka lapha benyamanye njengamhlabetshadayo befunge bagomela ukuthi bazaze behlukaniswe yikufa omunye esesiya kwembatha ingubo yomlala ungavuki, kwesinye isikhathi kuqala ukuhamba kungaba yindoda kumbe unkosikazi athi efika khonale athumele amatikiti endizamtshina ukuthi omunye wakhe alandele kulandwa amagceke aluhlaza (greener pastures).
Angazi ukuthi kufika kungene mpehlani bani, ithi isifika imbiko ivela khonale uzwe kuthiwa sebehlukene, mhlawumbe kubangelwa yikuthi kuyabe kungelababakazi ongabikelwa ukungaboni kwabo ngasolinye, ngentukuthelo uzwe sekuthiwa omunye usehlala yedwa kumbe usehlala lekhiwa.
Kulimaze umdeni udabuke ngaphakathi, kambe into ezenzakala emazweni akhatshana, iqiniso lakhona siyabe singazi ukuthi kwasuka kwangena nhlamvana bani, ngoba nxa kukhuluma indoda layo iyabe izigeza, ithi umkayo nguye oyabe ebelihlongandlebe, unkosikazi laye azibone emsulwa ingxakeko zonke aziphanyeke kumyeni wakhe.
Sidideke thina esisekhaya ngoba uyabe ungasazi ukuthi ume laluphi uhlangothi ngoba kuyizinto ezenzakala emazweni akhatshana njalo lezihlobo zizinlutshwane, bakhule ngokuhlulukelwa abantwana ngoba ukwehlukana kwabazali kudunguda umoya wabantwana ngoba bona abazali babo bebathanda bonke, siyasimangale ukuthi lawo magceke aluhlaza asuke abaqumbele bengabe besazi abakwenzayo, abanye siyasizwe ukuthi besebebanga ukulandela imikhuba lamasiko akhonale, sekufuna ukuphilwa njengamaNgisi sekuthathwa awethu amasiko lemikhuba sokungani yizinto zantolontolo ezingasebenziyo zijikwe ngefasitela zilahlelwe le zidliwe zinyoni, ozafuna ukulondoloza amasiko phakathi kwabo bobabili besekuqala ingxabano kuswele ozabhula umlilo, ngoba emazweni akhatshana liyabe selifanana xathu lentandane phela imilayo iyizwela kwabanye.
Kwesinye isikhathi kuyabe sokubangwa amalungelo ngoba awaphetsheya sizwa bethi anika kakhulu igunya abakasapho luka Eva, ufice indoda isiphathwa okwesitshubo sosane esilamaphumelo endingindi, bakhohlwe ukuthi kwelethu isiko indoda iyahlonitshwa njalo yiyo inhloko yomuzi, angazabe unkosikazi wayo uhola ukwedlula yona, kumbe noma uzalwa yizipatsha, nxa ethe wakhetha ukwendela lapha uyawugobela awuthobele umthetho wakuleli guma, ngoba akunkunzi zahlala sibaya sinye, zigwazana ize ifohle enye ibaleke.
Ayixabene.
Ungathinta umlobi ku 0714355641
