Uncategorized

Phos’ elakho: 2019 hamba, ungalingi ubuye . . !

16 Jan, 2020 - 00:01 0 Views
Phos’ elakho: 2019 hamba, ungalingi ubuye . . !

uMthunywa

Mehleli Dube  

Ngabe lumnyaka ubuyinhlanyelo besizayihlanyelela ewatheni kumbe ejikweni lendima ukuze idliwe zintaka, uthole izidlelo sezome okwethumba elingakavuthwa.

Ngumnyaka ongalonjwa nhlanyelo ngoba inengi lezizalwane zakwelakithi zidonse nzima zisidla luklubhu. Indlala ibibhahile emakhaya lasemadolobheni, kunye lezifuyweni lebantwini.

Lumnyaka awuzange ubelezulu eliyangaphi, lokhu kwabangela ukuncipha kwesivuno kwezokulima lamadlelo ajinge atshabalala kwasala kulugwadule kwezinye indawo kwaba lubhuqu angani bekugidela iwosana.

Lelanga belitshisa okwamagama, bekungani lehlisiwe kancane, aphela amanzi emadamu lemifuleni, kwehla ngitsho laye uZambezi imbala, yikho abathi kwabangela lokuthi amagetsi abe malutshwane elizweni lonke jikelele. Ukuswelakala kwamagetsi  kubangela impazamo ezinengi kakhulu. Abantu abanengi bafelwe zinkomo, imbuzi labobabhemi, lokhu kube buhlungu njengoba usazi ukuthi impilo yomuntu onsundu indikimba yayo igxile ezifuyweni. 

Banengi abahlaselwe ngumkhuhlane wenhliziyo ngemva kokufelwa yizifuyo. Ikakhulu emhlubulweni lapho engidabuka khona zifile inkomo, lakhathesi amanye amadoda asabopha amabhulugwe ngengxoza ngoba amabhanti sebebhoboze izikhala ibhanti lonke, phela zifuyile ezinye ingwevu zakithi.

Lezikhukhukazi ezifukamayo bezitshiya uqweqwe lwamaqanda engamagula ngenxa yokutshisa. Kwezomkhonomi akukhulunywa ngoba ukuthi uthole imali loba uyisebenzele bekusiba nzima, uhawule imali ulayo, uthi ungangena ebhanga uthole indwendwe zabantu amehlo ebomvu angani likhwezi elikhanywe ngamabele ophoko. EMpumalanga bafa abantu bakaMlimu bebulawa ngamanzi, abanye kuze kube lamhlanje lezidumbu zabo azikabonakali. 

Kuphinde kwedlula emhlabeni iqhawe lamaqhawe owayenguMongameli uMugabe. Isimanga wathi etshonile ngangithi kuzakuna izulu elinengi, phela inkolelo yethu abansundu yikuthi nxa kuthe kwedlula umuntu omdala kulandela izulu licitsha izinyawo zalapho akade kubuthenwe khona, kodwa kwaba lomqando owaqeda amazinyane lomoya owadiliza izindlu.

Yikho ngithi 2019 hamba ungabuyi ngoba utshiye usithezele olulofezela, sithemba u2020 uzaba lobubelo.

Ayixabene. 

Umlobi uthinteka kunombolo ezithi: 0714355641

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds