uMthunywa
Umngqutshu yikudla esikhule sikudla emitshadweni lakweminye imicimbi ebesisiya kuyo, lokhu okwerayisi yebo besiyidla kodwa hatshi ibingancintisani lomngqutshu, besiwudla sitshone izisu zigcwele.
Okudingakalayo
– Inkomitsho eyodwa yetshakada
– Amafutha okupheka
– Isawudo
– Imbiza
– Ukhezo
Ukupheka
– Gezisa itshakada lakho ulifake embizeni.
– Thela amankomitsho amane amanzi ufake eziko kuxhwathe.
– Nxa sokubuthakathaka faka isawudo kanye lamafutha.
– Ube ulokhu ukhangele ukuthi sokuvuthiwe na ngokuba ulokhu ulabila, nxa kungakavuthwa ubuthela amanzi kuze kuvuthwe.
– Nxa sokuvuthiwe ulesifiso sokufaka idobi sungalifaka-ke ugoqoze ngokhezo kuze kuhlangane.
– Ungabona ukuthi sokuvuthiwe ledobi selihlangene sungephula imbiza yakho-ke wekele kuphole.
Ukudliwa
Ngokusuthisa umngqutshu udlula isinkwa, ukuhlabusa khona angikhulumi nxa uphelekezelwa nguhololo olochago. Loba ngasiphi isikhathi kuyadliwa ukudla lokhu khona njengoba sesisondela kusikhathi sobusika lemini sungamtshova uhololo wakho olomngqutshu.
