uMthunywa
ISIQONGQWANE seLiverpool, uVirgil Van Dijk, asiwuzwa kuhle umbono wokuthi kuqedelwe isizini ye-English Premier League (EPL) ngaphandle kwabalandeli.
Ukungahambisani lombono lo kukaVan Dijk kulandela ukukhitshwa kwenyathelo labaphathi bamaqembu adlala ku-EPL.
Inhlanganiso ze-Premier League leFA zivumelane ukuthi mabalinde kuze kube sekupheleni kukaMabasa, mhlawumbe kuzobe sekulomehluko mayelana lokumemetheka kwegcikwane le-coronavirus. Umkhuhlane lo ususabalele umhlaba wonke wamisa amaligi ahlonitshwayo, okwenze layo i-EPL imise imidlalo yayo.
Ngaphambi kwalesi isinqumo, abanye besebethi akungabe kusaqhutshekwa kuvele ithathwe njengento engekho okutsho ukuthi akekho okumele ayetheswe umqhele wokunqoba ngokunjalo bangabikhona abadliwa yizembe kuligi le. Abanye babona kungcono ukuthi imidlalo eseleyo iqedelwe ngokudlala bengekho abalandeli.
ILiverpool okuyiyo ehamba phambili isalelwe ukunqoba imidlalo emibili ngaphambi kokuthi kuthiwe iyintshantshu yeligi. Yehlukaniswe ngemklomelo engu-25 le-Manchester City.
“Nxa singeke sikwazi ukuqeda isizini kumele sithole isixazululo esingcono esizokwenza kubelula ukuthi silungisise inkinga le esikhangelane layo.
“Bathi isixazululo esikhona yikuvumela iPremier League iqede yonke imidlalo eseleyo ngaphandle kwabalandeli.
“Akekho ofuna ukudlala imidlalo ngaphandle kwabalandeli,” kutsho uVan Dijk.
Umdlali lo uqhubeke wathi: “Nxa sinqoba inkezo enkundleni engelamuntu ngoba abalandeli bevinjiwe ngizaphatheka kabi. Kuyacaca ukuthi nxa bengekho abalandeli e-Anfield siyabe silimele kakhulu.
“Kuze kube kuthathwa isinqumo sokuthi siyakanjani phambili kusukela lapha, kuzamele sikhangelane lesimo ngqo.
“Kodwa nxa kucina ngokuthi sinqobe ngaphandle kwabalandeli siyabe sisanqobela bona, ngiyaqinisekisa.”
Ukuphambana kwembono kususwe ukumiswa kwemidlalo ye-EPL amasonto amathathu ngenxa yokuqubuka kwegciwane elaziwa nge-coronavirus eseligubuzele umhlaba wonke.
Kubaphathi bamaqembu adlala esigabeni esikhulu asebequbule inkulumo-mpikiswano ngokuthi kumele kuyiwe kanjani phambili.
Okwakhathesi abaphathi bamaqembu ePremier League babambene ngezihluthu ngokuthi yiphi indlela egcono okungayiwa ngayo phambili?
UKarren Brady, ongumsekeli kamgcinisihlalo weWest Ham United, ukholelwa ekutheni yonke isizini yebhola lase-England kufanele ikhansilwe.
Kodwa uPaul Baber, oyisikhulu esiphezulu ku-Brighton and Hove Albion uthi le indlela yokusonga ngaphandle kokuthi kuphume umpetha iyabe ingelabo “ubulungiswa” kuLiverpool ezihola phambili.
UBrady kuphephandaba iSun uqhube wathi: “Asikwazi ukugwema zonke izinto ezingase zenzeke kwi-English Football League nakwiPremier League.
Ngakho kufanele sikhansile yonke into bese sithi isizini ifanele lento engekho ngoba nxa abadlali bengadlali umdlalo awukho.”
UBrady ukhuluma kanje, iWest Ham ibekezelele ubunzima kulisizini njengoba ingaphezulu ngezindawo ezimbili ngenhla kwengalane yamaqembu azadliwa lizembe ngokuphela kwesizini.
Inkulumo yakhe imdonsele amanzi ngomsele.
“Wonke umuntu uyavumelana lokuthi iLiverpool FC kufanele ukunqoba isicoco,” kuTsho uBrady kuTwtter ephendula abalandeli bomdlalo.
“I-PL leEFL benza konke okusemandleni ukuqinisekisa ukuthi isizini iyasongwa, okuhlanganisa ukumiswa kwemidlalo lokukhitshwa inyumbazane kwabadlali, lokuthi uma kulesidingo imidlalo idlalwe ngaphandle kwabalandeli.
