uMthunywa
Ethel Ncube
BAZABE belitshebetshebe likaTshangani abantu esikolo seSigwambizi eFilabusi ngoMgqibelo lapho owayengumfundi wesikolo lesi abize idili lokugqugquzela abafundi abenze kuhle ezifundweni zabo lezemidlalo.
Owayengumfundi wesikolo lesi, uLerato Dube-Gwizi uthe kumcimbi lo uzaphathisa isikolo lesi ngempahla etshiyeneyo yokufunda.
Kumcimbi lo kunxuswe njalo abahlabeleli abadumileyo ababalisa uMadlela Sikhobokhobo, uMathanda uDJ Mapressa, Simunye Brothers kanye leDubai Masters abakhangelelwe ukujabulisa uzulu emcimbini lo.
Ekhuluma lentatheli uDJ Promise Mapressa ongumhleli walo umcimbi uthe uyajabula ngokwenziwa nguDube-Gwizi.
“Balutshwana abantu abathi bangafika eMzansi bakhumbule lapho abavela khona ukuthi baphathise. Umama uMaDube-Gwizi siyawubongela umsebenzi azawenzela abantwana esikolo lapho afunda khona. Kuyathabisa lokhu njalo silethemba isikolo laso sizasala sikwelinye izinga ngesizakuthola kuye. Lokhu kuveza izithelo ezinhle ngalesisikolo.
“Lathi sizajabulisa uzulu kulumcimbi ngobunono obukhulu ukuze okhekhe labo baphatheke bazizwe betshiseka ngemfundo yabo njalo bafise ukuqhubekela phambili,” nguDJ Mapressa lowo.
Iphephandaba likazulu lixhumane loDube-Gwizi oxhase lesisikolo ukuba lumdlalo uphumelele oveze ukutshiseka ngesikolo sakibo.
“Umntwana kumele athi angenza kuhle aphiwe isipho ukwenzela ukuthi aphinde ukwenza kuhle esiyaphambili. Esikolo lesi sekuleminyaka kungenziwa i-speech and prize giving ceremony, lokhu kuyabisela abantwana emuva.
“Mina ngafunda kulesisikolo, ngiyazi indingeko lenhlupho esibhekane lazo yikho ngithe ngisixhase ngibancedise ngezicathulo zesikolo, impahla zemidlalo, amabhuku lokunye okunengi. Kusenjalo ngibadingele labaculi abadumileyo abazahlabelela okhekhe laba ukuze bakholise.
“Ukupha esikolo lesi kuyindlela yokunika abantwana intshukuntshu yokuthi basebenze gadalala ezifundweni ngoba kulokuhle okubalindeleyo empilweni,” kuphetha uDube-Gwizi.
