Uncategorized

Owayejola lendoda yomuntu ubulewe yilunyoka

06 Jun, 2024 - 00:06 0 Views
Owayejola lendoda yomuntu ubulewe yilunyoka UChiyedza Samantha Luwizhi

uMthunywa

Yintatheli kaMthunywa

KULOWESIFAZANE esigodlweni seHarare endaweni ye-Epworth odlule emhlabeni ngoLwesine ngeviki ephelileyo kulandela ukuba lohlupho lokukhukhumala isisu, ngenxa yolunyoka okubikwa walufakwa ngumfazi wendoda ayethandana layo.

Kubikwa uChiyedza Samantha Luwizhi oleminyaka yokuzalwa engu-29, owesifazane olodaba lwakhe oluke lwasabalala kumaphephandaba kumaviki asanda kwedlula ngoba ekhukhumala isisu kunye lokuvuvuka umzimba wonke okunakanelwa ukuthi bekubangelwa ngumfazi wendoda akade esehambisana layo.

Kuvele ukuthi umuyi wabasemathandweni lowesilisa olemuli yakhe uMaxwell Chikwiramakomo oleminyaka yokuzalwa engu-46. Ukuzwanana kwalaba ababili kwabangela ukuthi umnikazi wendoda ahambele udaba lolu enyangeni. Ekufikeni kwakhe enyangeni waphiwa umuthi wolunyoka awufakela umkakhe. Lokhu yikho  okwacina sokusenza ukuthi umuyi uLuwizhi akhukhumale umzimba.

Intatheli ibuye yezwa ukuthi imuli lezi zombili eyakomuyi leyakoChikwiramakomo zake zahlangana enyangeni zonke zizama ukuyalungisisa udaba lolunyoka. Kodwa-ke kungasenani imuli kamuyi ayisenelisananga ukuthola imali eyayifunwa yinyanga ukuze lo osengumuyi athole usizo. Kubikwa njalo unkosikazi kaChikwiramakomo laye kasenelisanga ukuthola imali yokuthi inyanga le ikhiphe ulunyoka.

Unina kamuyi uNkosazana Ronester Nyamufukudza oleminyaka yokuzalwa engu-46, kunye loyise omncane kamuyi uTonderai Danda oleminyaka yokuzalwa engu-39, baveze ukuba bakubona, bazaphindisela ukufa komntanabo.

“Liqiniso sibili ukuthi uChiyedza usedlule emhlabeni, ubhubhe ngoLwesine ekuseni. Lami ngemukele ucingo luvela ebantwaneni bengazisa ngesahlakalo lesi. 

“Kasekho umntanami, ngisebuhlungwini bantu kodwa umntanami ngeke ahambe yedwa, sizaqedelana lalaba ababangele ukufa kwakhe labo bazakuzwa engikuzwayo,” nguNyamufukudza lo.

Kubuye kwavezwa njalo ukuthi umuyi uLuwizhi uthe esezabhubha uvumile ukuthi wayethandana lendoda kaMemory Mondo oleminyaka yokuzalwa engu-25 kusukela ngomnyaka ka2021. UMondo laye onguye umnikazi wendoda uvumile ukuthi wahamba enyangeni lapho aphiwa khona umuthi lo awufakela umkakhe. Besokusithi layo indoda yakhona uMaxwell ikhuluma lentatheli ivumile ukuthi yajolela umkayo lomuyi uLuwizhi.

Kubikwa ekuhambeni kwemuli lezi zombili enyangeni, uMondo wafika wathi enyangeni le ufuna ukubiselwa i-US$200 yakhe ayikhiphayo mhla  ephiwa umuthi wolunyoka lomunye umuthi. Inyanga yona kubikwa ibisisithi ifuna inkomo ezimbili ukuze yenelise ukubisela emuva ulunyoka lolu.

 

Share This:

Sponsored Links

Survey


We value your opinion! Take a moment to complete our survey

This will close in 20 seconds