Uncategorized

Owabulala abahlanu uphunyuka ijele…wayengaphilanga kuhle engqondweni

25 Mar, 2021 - 00:03 0 Views
Owabulala abahlanu uphunyuka ijele…wayengaphilanga kuhle engqondweni

uMthunywa

YiNtatheli kaMthunywa
INDODA yeGokwe eleminyaka yokuzalwa engu-21 eyagamula abantu abahlanu andubana ihlahlele lenkomo ezimbili ngobusuku bunye isinde ngokulambisa ukuyapika ejele kulandela ukuba umthethwandaba omkhulu uthole ukuba wayengaphilanga kuhle engqondweni ngesikhathi esenza amacala la ngenyanga kaMbimbitho nyakenye.

UChristopher Gotore owesiqintini seChimombe esigabeni seMarapira ngaphansi kwenduna uJiri wayehlala emzini kadadewabo uNkosazana Patience Gotore eMarangana, esigabeni seLusulu eBinga ngesikhathi edala amacala la.

Kubikwa mhlaka 6 Mbimbitho ngehola lesificaminwe mibili ntambama nyakenye, uGotore wadobha ihloka waqonda komakhelwane uAdmire Nyangarai wafika wamhlahlela ngehloka andubana alumathise indlu yokulala.

Unkosikazi kaNyangarai, uBibeat Munsaka (23) wenelisa ukubaleka lendodakazi yakhe uLoice Compassion Nyangarai olomnyaka owodwa embhabhulile, kodwa uGotore wamgijimisa wafika wabahlahlela ensimini yomumbu bafa.

UGotore wabuyela ngekhaya wafika wangena endlini yokulala lapho afika wahlahlela njalo umntakadadewabo ongumfana oleminyaka eyisikhombisa uShane kodwa omunye omncane owayelele kuleyondlu kazange amlimaze.

Waphuma kulelokamelo elokhu ephethe ihloka lakhe waqonda lapho okwakuhlezi khona udadewabo kunye lomkakhe uMnumzana Bruce Sibanda lobabakazi uChiravigwa Shumba (64) owayesanda kufika evela eGokwe wahlahlela uShumba ngehloka kabili entanyeni.

UMnu Sibanda lomkakhe babaleka sebehlulekile ukuthathela uGotore ihloka. UGotore wazama ukugijimisa uSibanda kodwa kazange amfice.

Ngemva kwalokho uGotore waqonda esibayeni wagamula inkomo kunye lethole andubana adliwe ngumnyama.

Ubesetheswa amacala amahlanu okubulala kanye lamabili okulimaza impahla kulandela ukufa kwabantu abahlanu, ukutshisa indlu kanye lokubulala inkomo ezimbili.

UMahluleli womthethwandaba omkhulu koBulawayo uJustice Martin Makonese obesesigabeni seHwange uthe indlela uGotore abulala ngayo iyethusa.

“Lesi ngesinye sezehlakalo zokubulala ezitshwaqisa umzimba futhi esidida ingqondo ngoba umsolwa wayengathi ufikelwe ngumoya wokubulala. Bonke ababulalayo balobuhlobo laye njalo akulangcazelo yokuziphatha kwakhe.

“Ubufakazi obulethwe emthethwandaba buveza ukuba wayengaphilanga kuhle engqondweni okwabangelwa yikusebenzisa izidakamizwa. Ufake isicelo sokuthi kalacala ngenxa yokungaphili kuhle engqondweni kukanti lakubufakazi obulethwe lapha senelisekile futhi simthola engelacala lokubulala okunengi kunye lokulimaza impahla ngenxa yokungaphili kuhle ngokweSigaba 29 soMthetho wezeMpilo Yengqondo. Umsolwa kumele abiselwe emthethwandaba kusalindwe ukuthi adluliselwe eMlondolozi Mental Health Institution njengoba eyingozi emphakathini,” kutsho uJustice Makonese.

Obetshutshisa kucala leli nguNkosikazi Martha Cheda.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds