uMthunywa
Leonard Ncube
KULEXHEGU leLupane elileminyaka yokuzalwa engu-61 elingabe selibhejele ukuhlala ejele iminyaka eminengi ngemva kokubotshwa kucatshangelwa ukuthi libambe umzukulu walo iganyavu okwamahlandla amanengi.
Umamangala, uMthunywa angeke amqambe ngegama, uleminyaka yokuzalwa engu-12 njalo ufunda ugwalo lwesikhombisa kwesinye isikolo eLupane.
Umsolwa laye ongeke aqanjwe ukuze kuvikelwe umamangala, uhlala elayinini yeDakiwe ngaphansi kwenduna uMabhikwa njalo uphume ejele kunyanga ezimbalwa ezedluleyo lapho akade egwetshelwe icala lokubulala usephinde wabuyela njalo ejele.
UMthunywa akasenelisanga ukuthola imininingwane ngecala likamsolwa elokubulala njalo ukuthi wayegwetshwe iminyaka emingaki.
Kubikwa umsolwa udale lelicala kusukela ngenyanga kaMbimbitho kusiya kuMabasa lonyaka.
Ngemva kokubamba umzukulu wakhe, umsolwa kubikwa ubemethusela ngokuthi uzambulala ukuze engatsheli muntu ngesihluku amenza sona.
Umsolwa umiswe phambi kukamantshi uMnumzana Ndumo Masuku emthethwandaba weLupane esetheswa icala lokubamba iganyavu.
Icala alikathonisiswa njalo lidluliselwe phambili kumhlaka 21 Nhlangula lapho umsolwa azakuma khona phambi kwedale njalo.
Uyabe evalelwe ejele esalinde ukuthonisiswa kwecala lakhe.
Umtshutshisi uMnumzana Derrick Ndlovu utshele umthethwandaba ukuthi umsolwa wabumba iqhinga lokubamba umzukulu wakhe ngemva kokuba besele bodwa ekhaya ngenyanga kaMabasa.
Kubikwa umsolwa wabizela umamangala ekamelweni lakhe lokulala wamdlwengula andubana amlaye ukuthi angatsheli muntu ngoba ezambulala.
Ngokwesaba ukubulawa umamangala akazange atshele muntu kwaze kwaba nguMabasa lapho umama wakhe wezwa ngodletshana luphuma emphakathini owawunanzelele ukuthi umntwana uyahlukunyezwa.
Umama kamamangala ngokwethuka, uhle wabikela amapholisa okwabangela ukuthi umsolwa abotshwe.
