uMthunywa
Kuviki ephelileyo sicine sitshengisa ukwakhiwa kwesabizwana sokukhomba buqamama. Sifunde ukuthi isabizwana sokukhomba buqamama sakhiwa kusabizwana sokukhomba eduze.
Ezabizwaneni zokukhomba eduze ezilelunga elilodwa u- lo lo –la, sijobelela u – wo. Esabizwaneni sokukhomba eduze silelunga elilodwa u –le sijobelela u –yo.
Nanzi ezinye izibonelo: Kusigaba 1 isabizwana sokukhomba eduze u –lo sijobelela u –wo sithole isabizwana sokukhomba buqamama u- lowo. Kusigaba 10 isabizwana sokukhomba eduze u-le sijobelela u-zo ukuze kutholakale isabizwana sokukhomba buqamama u – lezo.
Ezabizwaneni zokukhomba eduze ezilamalunga amanengi sisusa unkamisa wokucina besesijobelela u – o. Izibonelo: Kusigaba 2a isabizwana sokukhomba eduze u/laba/ sisusa unkamisa lab(a) osekucineni besesijobelela u –o sithole isabizwana sokukhomba buqamama u-labo.
Kusigaba 7 isabizwana sokukhomba eduze ngu/lesi/. Unkamisa lales(i) osekucineni uyasuswa indawo yakhe ithathwe ngonkamisa –o sithole isabizwana sokukhomba buqamama u –leso.
Ukwakhiwa kwesabizwana sokukhomba kude
Izabizwana zokukhomba kude lazo zakhiwa kuzabizwana zokukhomba eduze. Sijobelela u –ya ezabizwaneni kuzabizwana zokukhomba eduze. Abanye basebenzisa isijobelelo u – yana ezabizwaneni zokukhomba eduze. Kusigaba 1 Kusabizwana sokukhomba eduze /lo/ sijobelela u- ya abanye bejobelela u- yana sithole isabizwana sokukhomba kude u- loya/loyana.
Kusigaba 15 kusabizwana sokukhomba eduze /lokhu/ sijobelela u-ya abanye bejobelela u-yana Sithole isabizwana sokukhomba kude u – lokhuya/lokhuyana.
