Nkosilathi Sibanda
BONKE onompembe bomdlalo wenguqu kuleli bazahlolisiswa ulwazi lwabo kulumdlalo kulungiselelwa ukuqala kwemidlalo yePremier Soccer League.
Bazagijima baphinde bavule ingwalo kakutsha onompembe laba kudingwa ukuthi bengabe bekusimo esiqondileyo sokuphatha imidlalo yaphezulu. Imidlalo yePSL iqala mhlaka 15 Nkwenkwezi kumncintiswano okubikwa uzavula inkundla zeligi.
Umdlalo wenguqu wacina ukudlalwa ngoNhlolanja ka-2020.
Izifundo lezi zizaqhutshwa ngamalunga enhlanganiso yeZimbabwe Referees Association uBrighton Mudzamiri loBryton Malandule.
Kumbiko ophethwe liphephandaba likazulu, inhlanganiso yeSports and Recreation Commission ilobele onompembe bonke abangaphansi kweZimbabwe Referees Committee ibazisa ukuthi sebengaqala ukulungiselela.
“Kusukela ngoLwesihlanu, onompembe abakulumhlubulo welizwe bazacelwa ukuthi babuthane ekolitshini leBulawayo Polytechnic lase-Nantional University of Science and Technology.
“NgoLwesihlanu onompembe abazaphatheka bazaqala bahlolwe igcikwane le-Covid 19,” kutsho umbiko lo.
Kubikwa inhlanganiso yeZimbabwe Referees Association ithe izasebenza labonompembe abangamatshumi amahlanu kuphela ngoba kuzabe kulandelwa izinqumo ze-Covid 19.
Ngomnyaka odluleyo onompembe abangamatshumi ayisitshiya galombili baholiswa i$2000 yakuleli munye ngamunye, kuyimali yokuthi bathole usizo ngesikhathi inguqu ivaliwe ngenxa yegcikwane leCovid-19. Inhlanganiso yeZimbabwe Football Association yabika ukuba ikhathazekile ngokuthi igcikwane leCovid-19 selihlasele lempilakahle yabonompembe abaphila ngenguqu.