Ethel Ncube
KUSIGA esihlasimulisa umzimba kulendoda yeGokwe ngaphansi kwenduna uSai equme umntwana umphimbo ngengqamu yokusika isitshebo emkulwini yambulala, ngoMvulo kuyonale iviki.
Umetheswacala, uRutendo Shayanewako oleminyaka engu-25 yokuzalwa ubulele umntwana olemnyaka lenyanga eziyisithupha ezelwe.
Kuvezwe ukuba uThandiwe Bheura ongugogo kamuyi uBrilliant Mhike wayehlezi emkulwini lalumntwana. Ugogo kamuyi wapha umsolwa uRutendo ukudla kwakhe waqeda waphuma wayakupha ezinye izihlobo ezaziphandle ukudla watshiya umzukulu wakhe lomsolwa emkulwni. Uthe ephenduka wathola umetheswacala ebambe umntwana, eseqalisile ukumsika umphimbo, wazama ukuba ambambe kodwa umntwana wayesevele esequnyiwe, esopha kakhulu.
Bazama ukugijimisela umntwana esibhedlela kodwa ngokuswelakala kwenhlanhla umntwana wedlula emhlabeni, kafikanga lesibhedlela. URutendo Shayanewako kubikwe ukuba kaphilanga kuhle engqondweni.
Intatheli ixhumane lesikhulumi samapholisa eMidlands, uInspector Emanuel Mahoko, obike ukuba udaba olunjalo lufikile kibo.
