uMthunywa
Nkosilathi sibanda
UMQHUDELWANO wenkezo yeChibuku Super Cup uqhubekela phambili ngoLwesithathu oluzayo, kukhangelelwe ukuthi kube yisiqalo sokuphendukiswa kweligi, kutsho umaqhuzu wePremier Soccer League uKennedy Ndebele.
Kodwa, lo ongazange ahlatshwe ijekiseni lokuvikela iCovid-19 angeke angene enkundleni ukuyabukela imidlalo, loba ukungena kwababukeli kungakalungisiswa, uMthunywa ukudingisisile lokhu.
“Umdlalo wethu usuqalile. Sithanda ukubika ukuba silokuthaba ngosekelo esiluthole kuHulumende ngokuvumela ukuthi siqhubeke ngemidlalo yethu,” kutsho uNdebele.
“Njengokutsho kwePSL ukuthi sizaqala umncintiswano ekupheleni kukaMpandula, kuhle ukuzwa ukuba amaqembu eligi ephakemeyo aseqalile ukulolonga.”
Ukuphenduka komdlalo kuzafuqa ukuthi abaqeqetshi lezisebenzi zonke kumaqembu la ayehlatshwa ijekiseni leCovid-19.
Isikhulumi sePSL uKudzai Bare, ngesikhathi ekhuluma lephephandaba likazulu uthe uhlelo lokudibana kwamaqembu selukhona.
“Kulandela ukuvunyelwa ukuthi imidlalo iqalise, iPSL isixwayise amaqembu ukuthi alandele zonke izeluleko zeCovid-19,” nguBare lo.
“Sikhuthaza ukuba wonke umuntu okunguqu ahlatshwe ijekiseni lokulandela iziwayiso zokuvikela iCovid-19.”
Iphephandaba likazulu lingene ezitaladeni zakoBulawayo ngoLwesithathu kwavela ukuthi abathandi labalandeli bomdlalo wenguqu kudala belambele umdlalo.
UNobert Mdluli osekela iChicken Inn uthe: “Kade silindele. Umdlalo wenguqu ngowethu sonke. Nxa iPSL loHulumende sebevumelene akuvulwe, sizabukela,” kutsho uMdluli.
Kusenjalo amaqembu akumhlubulo wangezansi yelizwe iHighlanders, Chicken Inn, Bulawayo Chiefs leBulawayo City zibike ukuba seziqalile amalungiselelo.
Uluhlu lwemidlalo yeChibuku ezayo:
NgoLwesithathu, 29ku Mpandula
Herentals v ZPC Kariba 11am, Dynamos v Yadah 3pm (National Sports Stadium), Cranborne v Manica 11am, Black Rhinos v Tenax 3pm (Sakubva), Triangle v Ngezi 11am, FC Platinum v WhaWha 3pm (Mandava), Chicken Inn v Bulawayo City 1pm (Barbourfields)
NgoLwesine30kuMpandula
Harare City v Caps United 3pm (National Sport Stadium), Highlanders v Bulawayo Chiefs 3pm (Barbourfields)
